Friday, 30 September 2016

سلمان خان نے پاکستانی فنکاروں کی تائید کی

سلمان خان نے پاکستانی فنکاروں کی تائید کی



بالی ووڈ اداکار سلمان خان نے پاکستانی فنکاروں کی تائید کی ہے ۔ ایک دن پہلے ہی موشن پکچرس پروڈیوسر اسوسی ایشن نے پاکستانی فنکاروں اور ٹیکنیشنس پر پابندی لگانے کا فیصلہ کیا تھا ۔ سلمان خان نے اس تعلق سے پوچھے جانے پر کہا کہ یہ لوگ فنکار ہیں۔ یہ دو الگ مسائل ہیں ایک زمرہ میں دہشت گرد ہیں اور دوسرے میں فنکار ہیں ۔حال ہی میں راج ٹھاکرے کی ایم این ایس نے دھمکی دی تھی کہ ہندوستان میں رہنے والے تمام پاکستانی فنکار ملک چھوڑدیں ۔
سرحد پر تناو کے درمیان وادی میں بھی کشیدگی بڑھ گئی

سرحد پر تناو کے درمیان وادی میں بھی کشیدگی بڑھ گئی



سرحد پر تناو کے درمیان وادی میں بھی کشیدگی بڑھ گئی ہے ۔ جمعہ کو سرینگر‘ بارہمولہ‘ بدگام‘ اننت ناگ‘ شوپیان اور کلگام میں لوگ سڑکوں پر نکل ائے اور سیکیورٹی فورسس کے ساتھ ان کی جھڑپیں ہوئیں۔ سیکیورٹی فورسس نے طاقت کا استعمال کرتے ہوئے احتجاجیوں کو منتشر کیا ان جھڑپوں کے دوران کئی لوگ زخمی ہوئے۔ سرینگر کی جامع مسجد اور وادی کی کئی بڑی دوسری مسجدوں میں مسلسل بارہویں جمعہ کو نماز نہیں ہوئی ہے اس دوران کلگام میں اک پولیس پارٹی پر حملہ کی خبر ہے۔ کئی مقامات پر لوگوں نے شکایت کی کہ رات کے وقت پولیس نے گھروں میں گھس کر کریک ڈان کیا اور کئی کو گرفتار کیا
چائنا :ہندوستان اور پاکستان کے درمیان تناو پر فکرمندی

چائنا :ہندوستان اور پاکستان کے درمیان تناو پر فکرمندی



چائنا نے ہندوستان اور پاکستان کے درمیان تناو اور ٹکراو کی صورتحال پر فکرمندی کا اظہار کیا ہے اور دونوں ملکوں سے کہا کہ وہ صبر سے کام لیں۔ چائنا کی وزارت خارجہ کے ترجمان نی بیجنگ میں میڈیا سے بات چیت کرتے ہوئے کہا کہ ہندوستان اور پاکستان کے پڑوسی اور دوست کی حیثیت سے ہمیں تناو ٹکراو پر تشویش ہے ہم متعلقہ فریقوں سے کہتے ہیں کہ وہ ایسی کاروائیاں نہ کریں جن سے تناو بڑھتا ہو ۔ انہوں نے امید ظاہر کی کہ دونوں ملک مناسب طور پر بات چیت کے ذریعہ اپنے مسائل حل کریں گے انہوں نے کہا کہ چائنا دونوں ملکوں کے ساتھ ربط میں ہے اور ان سے خواہش کررہا ہے کہ وہ صبر سے کام لیں بات چیت کے چیانلس کھولیں اور اختلافات حل کریں ۔
ہندوستان کی زیادتیاں کشمیر میں لوگوں کے آزادی کے جذبہ کو دبا نہیں سکتی

ہندوستان کی زیادتیاں کشمیر میں لوگوں کے آزادی کے جذبہ کو دبا نہیں سکتی



پاکستان کے وزیراعظم نواز شریف نے کہا ہے کہ ہندوستان کی زیادتیاں کشمیر میں لوگوں کے آزادی کے جذبہ کو دبا نہیں سکتی۔ اسلام آباد میں کیبنٹ کی میٹنگ سے خطاب کرتے ہوئے انہوں نے کہا کہ کشمیر ہندوستان کی تقسیم کا نامکمل ایجنڈہ ہے۔ انہوں نے کہا کہ کسی کو بھی پاکستان کی سرزمین پر بری نظر نہیں ڈالنی چاہیے اور اس قوم کا ہر بچہ مادر وطن کی حفاظت کیلئے تیار ہے۔ نواز شریف نے کہا کہ ہم ایک پرامن ملک اور امن چاہتے ہیں ۔ سرحد پر تناو کے پس منظر میں نواز شریف نے یہ ہنگامی کیبنٹ میٹنگ بلائی ۔ وزیراعظم کے مشیرخارجہ سرتاج عزیز نے اس موقع پر کہا کہ کشمیری عوام کی جدوجہد کی تائید پاکستان کی ترجیح رہے گی اور وہ اس سلسلہ میں پیچھے نہیں ہٹے گا ۔ پاکستان کے وزیر دفاع خواجہ آصف نے یہ بات دہرائی کہ پاکستان تناو بڑھانا نہیں چاہتا لیکن کسی بھی صورتحال کے لیے سامنا کرنے تیار ہے ۔ پاکستانی کیبنٹ کی اس میٹنگ میں لائن آف کنٹرول پار کرکے پاکستان کے علاقہ میں سرجیکل اسٹرائکس کے ہندوستان کے دعوے کو مسترد کردیا گیا ۔ نواز شریف نے کہا کہ ہندوستان کے ارادے علاقہ کے امن کیلئے خطرہ ہیں ۔
پاکستان میں پکڑے گئے سپاہی کو چھڑانے کیلئے تمام کوششیں کریں گے

پاکستان میں پکڑے گئے سپاہی کو چھڑانے کیلئے تمام کوششیں کریں گے



وزیر داخلہ راجناتھ سنگھ نے کہا ہے کہ پاکستان کی قید میں چلے جانے والے ایک ہندوستانی سپاہی کی رہائی کیلئے تمام کوششیں کی جارہی ہیں ۔ عہدیداروں نے بتایا کہ یہ سپاہی انجانے میں پاکستان کے علاقہ میں چلاگیا ۔ دہلی میں میڈیا سے بات چیت کرتے ہوئے راجناتھ سنگھ نے کہا کہ حکومت نے ان خبروں کا نوٹ لیا ہے کہ ہندوستانی سپاہی پاکستان کی حراست میں ہے ۔ وزیر داخلہ نے کہا کہ اس سپاہی کی جلد رہائی کو یقینی بنانے کیلئے اس معاملہ کو اسلام آباد سے رجوع کیا جائے گا ۔ عہدیداروں نے کہا کہ اس سپاہی کے پاکستانی علاقہ میں جانے کا تعلق فوجی کاروائی سے نہیں ہے ۔ اس سے پہلے پاکستان نے کہا تھا کہ اس نے ہندوستان کے ایک سپاہی کو گرفتارکرلیا ہے جو لائن آف کنٹرول کو پارکرکے پاکستانی علاقہ میں آیا تھا ۔ بتایا گیا کہ اس سپاہی کا تعلق مہاراشٹرا سے ہے ۔
سری نگر کے بعض علاقوں میں کرفیو نافذ

سری نگر کے بعض علاقوں میں کرفیو نافذ



جمعہ اور علحیدگی پسند تنظیموں کی طرف سے لال چوک کے گھیراؤ کے اعلان کے پیش نظر آج سری نگر کے بعض علاقوں میں کرفیو نافذ کردیاگیاہے۔ مقامی پولیس کے مطابق سری نگر ، بٹا مالو، اور مسیوم کے بعض علاقوں میں کرفیو نافذ کیاگیاہے۔ لال چوک جانے والے تمام راستوں کو بند کردیاگیاہے۔ علیحدگی پسند تنظیموں کی طرف سے ہڑتال اور احتجاج کی مدت کو چھ اکٹوبر تک توسیع کئے جانے کے اعلان کے وجہ سے آج چوریاسیویں دن بھی وادی میں عام زندگی ٹھپ دیکھی گئی۔
ڈھائی سال میں وزیراعظم نے اچھا قدم اٹھایا: راہول گاندھی

ڈھائی سال میں وزیراعظم نے اچھا قدم اٹھایا: راہول گاندھی



کانگریس کے نائب صدر راہول گاندھی نے عسکریت پسندوں کے خلاف ہندوستانی فوج کی کاروائی پر وزیراعظم کو مبارکباد دی ہے۔ بلند شہر میں ایک ریالی سے خطاب کرتے ہوئے راہول گاندھی نے کہا کہ ڈھائی سال میں وزیراعظم نے اچھا قدم اٹھایاہے۔
حیدرآباد کے شمس آباد ایرپورٹ پر سیکیورٹی سخت

حیدرآباد کے شمس آباد ایرپورٹ پر سیکیورٹی سخت



سرحد پرجاری کشیدگی کے پیش نظر حیدرآباد کے شمس آباد ایرپورٹ پر بھی سیکیورٹی سخت کردی گئی ہے ۔ پولیس کی طرف سے ایرپورٹ کے اندر اور باہر تلاشی لی جارہی ہے ۔ ایرپورٹ کے احاطہ میں نیم فوجی دستوں کو بھی تعینات کیا گیا ہے۔
پاکستان کی سرحد سے لگے پنجاب کے علاقوں سے عوام کا تخلیہ جاری

پاکستان کی سرحد سے لگے پنجاب کے علاقوں سے عوام کا تخلیہ جاری



لائن آف کنٹرول کے پاس عسکریت پسندوں کے ٹھکانوں پر ہندوستانی فوج کے سرجیکل حملوں کے بعدسرحدی کشیدگی کے پیش نظر پنجاب کے سرحدی علاقوں سے عوام کا تخلیہ کروایاجارہاہے۔ فاضیلکا نامی سرحدی علاقے سے درجنوں خاندانوں کو فوج کی مدد سے محفوظ مقامات پر منتقل کیاجارہاہے۔
پنجاب کے فیروز پور علاقہ سے بھی عوام کا تخلیہ کرایاجارہاہے۔ مقامی انتظامیہ کی مدد سے عوام کو سیکوریٹی خدشات کے پیش نظر محفوظ مقامات پر منتقل ہونے کی ہدایت دی گئی ہے۔
پنجاب کے اٹاری اور دوسرے علاقوں سے بھی عوام کا تخلیہ کراگیاہے ۔ مقامی گردواروں میں ہندوستانی فوج کے لئے پرارتھنائیں کی گئی ہیں۔ سرحدی علاقوں میں جاری کشیدگی کے پیش نظر بڑے پیمانے پر عوام کا تخلیہ کرایاجارہاہے۔
اُدھر پٹھان کوٹ میں پنجاب کے سرحدی علاقوں کے عوام کو ریلیف کیمپ میں رکھاگیاہے۔ عوام کو کیمپس میں طعام کا انتظام کیاگیاہے۔
دوسری طرف کشمیر کے ہندوارہ کے نوگام میں سرحدی چوکیوں پر سخت چوکسی اختیار کی جارہی ہے۔ ہندوستانی فوج کے دستوں کو متحرک دیکھاگیاہے۔
بچہ بچہ ملک کا دفاع کرے گا ۔ پاکستانی وزیراعظم

بچہ بچہ ملک کا دفاع کرے گا ۔ پاکستانی وزیراعظم



ہندوستان فوج کی طرف سے لائن آف کنٹرول کے پاس کئے گئے سرجیکل حملوں کے بعد پاکستان کے وزیراعظم نواز شریف نے کہا ہے کہ ہم خطے اور پوری دنیا میں امن چاہتے ہیں۔ نواز شریف کی قیادت میں آج پاکستانی کابینہ کا اجلاس منعقدہوا۔ جس میں ہندوستانی فوج کے سرجیکل حملوں کی مذمت بھی کی گئی۔ پاکستان کے وزیردفاع خواجہ آصف نے سرحدی سیکوریٹی کی صورتحال سے وزیراعظم کو واقف کروایا۔ نواز شریف نے یہ بھی کہا کہ ملک کے دفاع کے لئے قوم کا بچہ بچہ تیارہے۔ کسی کو بھی پاکستان کی سرزمین پر گندی نظر ڈالنے کی اجازت نہیں دی جائے گی۔
لائن آف کنٹرول پر پاکستانی فوج کی بلااشتعال فائرنگ کی اطلاعات

لائن آف کنٹرول پر پاکستانی فوج کی بلااشتعال فائرنگ کی اطلاعات



لائن آف کنٹرول پر پاکستانی فوج کی طرف سے آج پھر بلااشتعال فائرنگ کی گئی ہے۔ پتہ چلا ہے کہ پاکستانی فوج نے مختلف چوکیوں پر فائرنگ کی ۔ تاہم ابھی تک اس فائرنگ میں کسی بھی طرح کے کئی نقصان کی اطلاع نہیں ملی ہے ۔ اس دوران وزیرداخلہ راج ناتھ سنگھ نے آج سرحد کے صورتحال کا اعلی سطحی اجلاس میں جائزہ لیاہے۔ اجلاس میں قومی سلامتی کے مشیر اجیت دوول بھی موجود تھے۔ وزیرداخلہ نے پاکستانی فوج کی تحویل میں موجود چندوچوہان کے معاملے پر تفصیلات حاصل کیں۔ واضح رہے کہ پاکستانی میڈیا میں یہ اطلاعات گشت کررہی ہیں کہ ہندوستان کے آٹھ فوجیوں کو گذشتہ روز کی کاروائی میں ہلاک کیاگیاہے اور ایک کو زندہ پکڑا گیاہے۔ حکومت کی طرف سے چوہان کی رہائی کے لئے پاکستانی حکام سے بات چیت کرنے کا بھی فیصلہ کیاگیاہے۔

Thursday, 29 September 2016

Tuesday, 27 September 2016

حیدر آباد :ناجائز تعلقات کے افشاء سے خوفزدہ بیٹے پرظلم کرنے والی بد چلن خاتون اوراس کا عاشق جادوگر گرفتار

حیدر آباد :ناجائز تعلقات کے افشاء سے خوفزدہ بیٹے پرظلم کرنے والی بد چلن خاتون اوراس کا عاشق جادوگر گرفتار






عملیات اور جن وشیاطین اُتارنے کے نام پر کمسن بچوں کا خون پینے والے ایک انسان نما درندے کو ساتھ زون پولیس نے ڈی سی پی کی نگرانی میں گرفتارکرلیا ہے۔ ساتھ ہی ساتھ پولیس نے ماں جیسے انتہائی قابل احترام ومقدس رشتہ کو داغدار کرنے والی خاتون کوبھی حراست میں لے لیاہے جس نے محض عامل سے اپنے ناجائز تعلقات کے افشاء کے خوف سے اپنے ہی لخت جگر کو فیاض انصاری نامی عامل کے حوالے کردیاتھا جس نے تین ماہ تک ریحان نامی دس سالہ لڑکے کوناقابل بیان اورناقابل تصوراذیتیں دی تھیں۔ ڈی سی پی ساوتھ زون نے بتایاکہ قادر نامی شخص جو کویت میں ملازمت کرتا ہے اس کی بیوی فرحانہ اور لڑکا ریحان شاہین نگر میں رہتے ہیں ۔فرحانہ بدچلن تھی اور اس کے ناجائز تعلقات بابا نگر کے فیاض انصاری نامی شخص سے تھے جو گندا علم کرتا ہے اور ممبئی کا رہنے والا ہے۔ ڈی سی پی نے بتایاکہ ریحان نے ایک مرتبہ اپنی ماں کو فیاض کے ساتھ قابل اعتراض حالت میں دیکھ لیا تھا اورماں سے پوچھا تھاکہ فیاض آپ کے ساتھ ایسا کیوں کرتا ہے جس پر سنگ دل فرحانہ اپنے ہی لخت جگر کو عامل کے پاس لے گئی اورکہاکہ اس پر جن ہے ‘اُتار دو اس کے بعد تقریباً تین ماہ تک ناقابل بیاں مختلف طریقے استعمال کرتے ہوئے ریحان کی حالت پاگلوں جیسی کردی گئی۔ اس بات کا علم اس وقت ہوا جب قادر چھٹی پر شہر آیا ۔ ریحان نے ڈرتے ڈرتے ساری بات بتائی ۔جس پر قادر پولیس سے رجوع ہوا اورپولیس نے پیر کی رات دھاوا کرتے ہوئے فیاض انصاری اور فرحانہ کو گرفت میں لے لیا۔ حیرت انگیز طورپرفیاض انصاری کے قبضہ سے اس کے سارے گندے کرتوتوں کے ویڈیو بھی برآمد کئے گئے۔ جس کی فیاض خود شوٹنگ کرتاتھا اوربعدمیں اسے دیکھ کر مزہ لیتاتھا۔ ڈی سی پی نے اس سفلی عامل کے خلاف سخت کاروائی کا تیقن دیا ہے۔
ساوتھ زون پولیس نے پرانے شہر کے مختلف علاقوں میں بڑے پیمانے پرتلاشی مہم انجام دیتے ہوئے کالاجادو کرنے والے چودہ جادوگروں کو گرفتارکرلیا ہے۔ ڈی سی پی ساوتھ زون وی ستیہ نارائنہ کی قیادت میں یہ کاروائی کی گئی۔ بتایاگیا ہے کہ کنچن باغ پولیس اسٹیشن کے حدود میں کالا جادو کرنے والے ایک شخص کی طرف سے نابالغ بچے کا اغوا کیاگیاتھا اور اُس کے ساتھ ناشائستہ سلوک بھی کیاگیاتھا۔ پولیس نے منگل کو چلائی گئی مہم کے دوران کنچن باغ سے فیاض محمود‘ سنتوش نگر سے انور اللہ خان‘ چھتری ناکہ سے بنڈی راما کرشنا‘ ڈی یادیا‘ رسول خان‘ سودھو نیتین‘ شیخ اکرام الدین‘ بھوانی نگر سے سیدانور ‘شاکر علی ‘عبدالماجد ‘سماء مسرور عرف سماء چوش ‘مغلپورہ سے بلویرسنگھ‘ مکیش کمار ‘سنجے کمار ‘ایم اے رحیم اورقیصر کو گرفتارکیا ہے۔پولیس نے بتایاکہ سنتوش نگر کا ساکن انوار اللہ خان عرف ڈسکو بابا جوکہ پیشے سے ڈاکٹر ہے اس نے سیدافتخار حسین نامی شخص سے پینتیس لاکھ روپئے لئے تھے۔ بتایاگیاکہ افتخارحسین کاچی گوڑہ میں تیار ملبوسات کا کاروبار کرتے تھے لیکن انہیں کاروبار میں نقصان ہواتھا جس کے بعد وہ ڈسکو بابا کے رابطہ میں آئے۔ افتخار سے ملنے کے بعد انور اللہ عرف ڈسکو بابا نے کہاکہ ان کے مکان میں موجود خزانے کو نکالنے کیلئے کالاجادو کرنا پڑے گا اوراسے اس کا اچھا تجربہ ہے۔ اس نے یہ بھی بتایاکہ چیلا پورہ میں اس نے ایک مکان سے خزانہ نکالاتھا۔اسی مقصد کے لئے ڈسکو بابا نے افتخار کے گھر میں کھدوائی کی اور بعض سونے کے رنگ کئے ہوئے بسکٹ نکالے اور بتایاکہ یہی اصلی سونے کے بسکٹ اور خزانہ ہے۔ اس کے لئے بابا نے پینتیس لاکھ روپئے کی رقم بھی حاصل کی۔ لیکن بعدمیں جب افتخار کویہ پتہ چلاکہ یہ نقلی بسکٹ ہے اورانوراللہ نے دھوکہ دیا ہے توانہوں نے پولیس میں شکایت درج کرائی لیکن بابا نے اسے سنگین نتائج کی دھمکی دی۔ پولیس کے مطابق ڈسکو بابا کئی واقعات میں ملوث ہے۔ پولیس نے عوام سے اپیل کی ہے کہ وہ کالے جادو کی چکر میں نہ آئیں اور خزانے کی دستیابی کے سلسلے میں بھی توجہ نہ دیں۔ ڈی سی پی نے انتباہ دیاکہ تمام جادوگروں کے خلاف سخت کاروائی کی جائے گی ۔
نالوں پر تعمیر کئے گئے غیر مجاز تعمیرات کی انہدامی کاروائی جاری

نالوں پر تعمیر کئے گئے غیر مجاز تعمیرات کی انہدامی کاروائی جاری



وزیراعلی کے چندرشیکھرراؤ کی ہدایت پر جی ایچ ایم سی کے حدودمیں آج دوسرے دن بھی بلدیہ کی طرف سے نالوں پر تعمیر کئے گئے غیر مجاز تعمیرات کی انہدامی کاروائی جاری ہے۔ بلدی عملے نے گچی باؤلی ، بیگم پیٹ، الوال، کاپرا، چادرگھاٹ، رامنتاپور، کے علاقوں میں کئی غیر مجاز تعمیرات کو منہدم کردیا۔ واضح رہے کہ حالیہ چند دنوں کی بارش کی وجہ سے رہائیشی علاقوں میں پانی داخل ہوگیاتھا جس کی وجہ سے صورتحال سنگین ہوگئی تھی۔ بلدیہ کی چوبیس ٹیموں نے آج صبح کئی علاقوں میں انہدامی کاروائی انجام دی۔ بعض مقامات پر مکینوں اور بلدی عملے کے درمیان بحث وتکرار بھی دیکھی گئی۔ بنجارہ ہلز اور گچی باؤلی میں مزاحمت کی بھی کوشش کی گئیی۔ راجندرنگر،شیر لنگم پلی اور قطب اللہ پور کے علاقوں میں بھی انہدامی کاروائی کی گئی۔ پولیس کے بھاری دستوں کو بھی اس کاروائی کے دوران تعینات کیاگیاتھا۔ آدرش نگر ، شانتی نگر، آرام گڑھ، بالا جی نگر، بھگت سنگھ نگر، سبھاش نگر، اوردوسرے مقامات پر بلدی عہدیداروں کی موجود گی میں نالوں پر تعمیر کئے گئے ڈھانچوں کو منہدم کردیاگیا۔ عہدیداروں کی طرف سے دستاویزات بھی طلب کئے گئے۔ پتہ چلا ہے کہ جی ایچ ایم سی کے کال سنٹر کو ایک سواٹھار ہ سے زائد غیر مجاز تعمیرات کے خلاف شکایتیں موصول ہوئی تھیں۔ رنگاریڈی ضلع میں بھی نالوں پر تعمیر کی گئی غیر قانونی تعمیرات کو منہدم کیاجارہاہے۔ محکمہ بلدیہ نے انتباہ دیاہے کہ غیر مجازتعمیرت کے ذمہ داروں کے خلاف سخت کاروائی کی جائے گی۔ معلوم ہواہے کہ دپتی شری نگر میں نالے میں دوکلومیٹر تک تعمیرات پائی گئیں۔ یہاں پربھی تعمیرات کو منہدم کیاگیاہے۔ ملک پیٹ کے واحد نگر ،شنکر نگر اور پدما نگر میں بھی انہدامی کاروائی کی جارہی ہے۔
 عصمت ریزی کا شکار خاتون پر تیزاب پھینکا گیا

عصمت ریزی کا شکار خاتون پر تیزاب پھینکا گیا



اترپردیش کے شہر بلند شہر میں عصمت ریزی کا شکار خاتون پر مقدمے کے ملزم کی طرف سے تیزاب پھینکے جانے کا واقعہ پیش آیاہے۔ تفصیلات کے مطابق تیس سالہ خاتون کے ساتھ نو اگست کو عصمت ریزی کی گئی تھی لیکن پولیس کی طرف سے دوستمبر کو ایف آئی آر درج کی گئی تھی۔ یہ واقعہ کوتوالی پولیس اسٹیشن کے حدودمیں پیش آیاتھا۔ ملزمین کی طرف سے پہلے متاثرہ خاتو ن اورا س کے شوہر پر پولیس میں شکایت درج نہ کرانے کے لئے دباؤ ڈالا گیاتھا۔ تاہم عدالت سے رجوع ہونے کے بعدپولیس نے مقدمہ درج کیا۔ پولیس کی طرف سے یہ کہا گیاتھا کہ متاثر ہ خاتو ن جھوٹے الزامات لگا رہی ہے۔ متاثرہ خاتون نے بتایا کہ شکایت نہ کرنے کے دباؤ کونہ ماننے پر ہی اس پر تیزاب پھینکا گیاہے۔ مقامی ایس پی مان سنگھ چوہان نے بتایا کہ تین ملزمین سرجیت ،پرمجیت، اور ویرپال کی شناخت کرلی گئی ہے۔ اوران کی گرفتاری کیلئے کاروائی شروع کردی گئی ہے۔
اترپردیش : خاتون کو دھمکا کر عصمت ریزی کا واقعہ

اترپردیش : خاتون کو دھمکا کر عصمت ریزی کا واقعہ



اترپردیش کے بریلی میں ایک خاتون کو دھمکا کر عصمت ریزی کا واقعہ پیش آیاہے۔ متاثرہ خاتون نے بتایا کہ بعض افراد اس کے گھر میں گھس آئے اور اس کے ساتھ زبردست کی گئی۔ اس کے شوہر کو بھی باندھ کر زدوکوب کیاگیا۔اوربندوق سے فائر بھی کیاگیا۔دوسری طرف پولیس کا کہنا ہے کہ یہ خاندان کا آپسی مسئلہ ہے۔اس سلسلے میں کیس درج کرتے ہوئے تحقیقات شروع کردی گئی ہیں۔
سابق عہدیدار بی کے بنسل اور ان کے فرزند نے مبینہ طور پر خودکشی کرلی

سابق عہدیدار بی کے بنسل اور ان کے فرزند نے مبینہ طور پر خودکشی کرلی



سابق عہدیدار بی کے بنسل اور ان کے فرزند نے مبینہ طور پر خودکشی کرلی ہے ۔ واضخ رہے کہ بنسل اور ان کے بیٹے پر ممبئی کی ایک فارما کمپنی کے خلاف تحقیقات کے سلسلہ میں الزامات وضع کئے گئے ہیں۔ واضح رہے کہ بنسل ڈائرکٹر جنرل برائے کارپوریٹ امور کی حیثیت سے خدمات انجام دے رہے تھے اور جولائی میں رشوت لینے کے معاملہ میں سی بی آئی نے ان سے پوچھ تاچھ کی تھی ۔ مشرقی دہلی میں بنسل اور ان کے بیٹے کی لاشیں آج دستیاب ہوئیں ۔ پولیس نے لاشوں کو دواخانہ منتقل کردیا ہے اور اس سلسلہ میں تحقیقات شروع کردی ہے ۔
مسلمانوں کو پانچ فیصد تحفظات فراہم کئے جانے چاہئیں :  وارث پٹھان

مسلمانوں کو پانچ فیصد تحفظات فراہم کئے جانے چاہئیں : وارث پٹھان

 , 


ممبئی بائیکلہ کے مجلس کے رکن اسمبلی وارث پٹھان نے کہا ہے کہ مہاراشٹرا میں مسلمانوں کو پانچ فیصد تحفظات فراہم کئے جانے چاہئیں ۔ میڈیا سے بات کرتے ہوئے وارث پٹھان نے کہا کہ مہاراشٹرا کا مسلمان سماجی اور معاشی طور پر پسماندہ ہے تو اس بنیاد پر انہیں تحفظات ملنے چاہئیں ۔ مجلس کے رکن اسمبلی نے کہا کہ مراٹھوں کو تحفظات دیئے جاتے ہیں انہیں کوئی اعتراض نہیں ہے ۔ اگر مراٹھا تحفظات کیلئے بل منظور کیا جاتا ہے تو پھر مسلمانوں کیلئے بھی تحفظات فراہم کئے جانے چاہئیں ۔
کرن جوہر کے ممبئی میں واقع قیامگاہ کے روبرو دھرنا

کرن جوہر کے ممبئی میں واقع قیامگاہ کے روبرو دھرنا



مہاراشٹرا نونرمان سینا کے کارکنوں نے فلم ساز کرن جوہر کے ممبئی میں واقع قیامگاہ کے روبرو دھرنا دیا اور نعرے بازی کی ۔ بتایا گیا ہے کہ کرن جوہر کی فلم میں پاکستانی اداکار فواد خان نے کام کیا ہے ۔ ایم این ایس کی طرف سے پاکستانی آرٹسٹوں کو اڑتالیس گھنٹوں میں ملک چھوڑنے کی دھمکی کے بعد کرن جوہر نے کہا تھا کہ پاکستانی آرٹسٹوں کو ملک چھوڑنے کی دھمکی سی مسئلہ کا حل نہیں نکلے گا ۔ یہ بھی پتہ چلا ہے کہ فواد خان ہندوستان سے جاچکے ہیں۔ ایم این ایس کے کارکنوں نے نواز شریف کے تصویر پر بھی چپلیں ماریں ۔
کشمیر میں آج اکیاوسیں دن میں بھی عام زندگی مفلو ج

کشمیر میں آج اکیاوسیں دن میں بھی عام زندگی مفلو ج



کشمیر میں آج اکیاوسیں دن میں بھی عام زندگی مفلو ج ہی دیکھی گئی۔ کرفیو نہ ہونے کے باوجود بھی وادی میں کاروباری، تعلیمی ، اور دیگر ادارے بند دیکھے گئے۔ وادی کے کئی علاقوں میں دفعہ ایک سوچنوالیس پر عمل کیاجارہاہے۔ بتایاگیاہے کہ کشٹاروٹاون میں پرتشدد واقعات کے بعد حالات کشید ہ دیکھے گئے۔ حساس مقامات پر پولیس اور سیکوریٹی فورسس کی طرف سے تلاشی مہم میں شدید دیکھی گئی ہے۔ نوجولائی سے وادی میں پیش آئے پرتشدد واقعات میں بیاسی افراد جان بحق ہوچکے ہیں جبکہ سات ہزار سے زائد زخمی ہوئے ہیں۔
اترپردیش کے اسمبلی انتخابات کے لئے تیاریاں

اترپردیش کے اسمبلی انتخابات کے لئے تیاریاں



مرکزی الیکشن کمشنر نسیم زیدی نے اترپردیش کے ڈسٹرکٹ مجسٹریٹ اور ایس پیز کو آئندہ سال کے اوائل میں منعقد ہونے والے انتخابات کیلئے تیاریاں شروع کرنے کی ہدایت دی ہے ۔ تین دن سے اترپردیش کے دورہ پر موجود نسیم زیدی نے مختلف سیاسی جماعتوں کے قائدین سے بھی ملاقات کی اور ان کی نمائندگیوں کو بھی قبول کیا تھا ۔ مرکزی الیکشن کمشنر نے تمام فہرست رائے دہندگان کو ترجیحی بنیاد پر تیار رکھنے کی بھی ہدایت دی ہے ۔ اس سلسلہ میں میڈیا سے بات کرتے ہوئے نسیم زیدی نے بتایا کہ انتخابات کو شفاف بنانے کیلئے کئی نمائندگیاں سیاسی جماعتوں سے موصول ہوئی ہیں اور اس سلسلہ میں موثر اقدامات کئے جائیں گے ۔ انہوں نے یہ بھی کہا کہ انتخابات کے دوران رقم کی منتقلی اور غیر سماجی عناصر کی سرگرمیوں سے بھی سختی کے ساتھ نمٹا جائے گا ۔ ان کا کہنا تھا کہ سیاسی جماعتوں نے بعض تجاویز پیش کی تھیں ۔ اور اس سلسلہ میں اقدامات کئے جائیں گے ۔
جن کے گھر شیشے کے ہوں وہ دوسروں پر پتھر نہیں پھینکا کرتے

جن کے گھر شیشے کے ہوں وہ دوسروں پر پتھر نہیں پھینکا کرتے



جن کے گھر شیشے کے ہوں وہ دوسروں پر پھترنہیں پھینکا کرتے۔ اقوام متحدہ جنرل اسمبلی سے خطاب کرتے ہوئے ہندوستانی وزیرخارجہ سشما سوراج نے پاکستان کے وزیراعظم کی طرف سے لگائے گئے الزامات کے تناظر میں یہ بات کہی۔ سشما سوراج نے کہا کہ وزیراعظم پاکستان نے اکیس تاریخ کو اسی اجلاس سے خطاب کرتے ہوئے کہا کہ تھا کہ ہندوستان انسانی حقوق کی خلاف ورزی کررہا ہے لیکن وہ یہ کہناچاہتی ہیں کہ پاکستانی وزیراعظم کو یہ دیکھناچاہیے کہ بلوچستان میں کیا ہورہاہے اور وزیراعظم کیاکررہے ہیں۔ ان کا کہناتھا کہ بلوچستان میں انسانی حقوق کی پامالی انتہا کو پہنچ چکی ہے۔ ہندوستانی وزیرخارجہ نے پاکستانی وزیراعظم کی طرف سے دونوں ممالک کے درمیان مذاکرات کے لئے پیشگی شرائط کے ریمارکس کو بھی مضحکہ خیز قراردیا۔ان کاکہناتھا کہ ہم نے این ڈی اے حکومت کی حلف برداری تقریب میں وزیراعظم پاکستان کو مدعو کیاتھا اور ہم نے کوئی شرط نہیں رکھی تھی۔

Monday, 26 September 2016

Sunday, 25 September 2016

Saturday, 24 September 2016

تلنگانہ میں دو سال تک خشک سالی نہیں رہے گی

تلنگانہ میں دو سال تک خشک سالی نہیں رہے گی



وزیراعلیٰ کے چندرشیکھرراؤ نے کہا ہے کہ بارش سے پیدا حالات اورناگہانی صورتحال سے نمٹنے کے لئے انتظامیہ اور فوج پوری طرح سے تیار ہے۔ریاست میں جاری بارش سے پیدا حالات کا اعلیٰ سطحی اجلاس میں جائزہ لینے کے بعد میڈیا سے بات کرتے ہوئے وزیراعلیٰ نے کہاکہ پانچ اضلاع میں ہائی الرٹ جاری کیاگیا ہے۔ حکومت پوری طرح سے متحرک ہے ۔ وزیراعلیٰ نے بتایاکہ جاریہ بارش سے تلنگانہ میں دو سال تک خشک سالی نہیں رہے گی ۔ناگرجناساگر کوچھوڑکر تمام ذخائر آب لبریز ہوچکے ہیں۔ کے سی آر نے کہاکہ بارش کی وجہ سے متاثرہ سڑکوں کی مرمت کیلئے تین سو کروڑروپئے جاری کئے جائیں گے۔ انہوں نے یہ بھی بتایاکہ جی ایچ ایم سی کومستحکم اور اس کی کارکردگی کو بہتربنانے کے لئے حکومت اپنی ضمانت پر پندرہ تا بیس ہزار کروڑروپئے کا قرض دلائے گی۔ وزیراعلیٰ نے کہاکہ مشن کاکتیہ پروگرام کامیاب رہا ہے جس کی وجہ سے ذخائر آب اور جھیلیں لبریز ہوچکی ہیں۔غیرمجاز تعمیرات کا سخت نوٹ لیتے ہوئے وزیراعلیٰ نے کہاکہ شہر میں تمام غیرمجاز تعمیرات کے خلاف بارش کے روکنے کے بعد کاروائی کی جائے گی۔ چو بیس سرکل کے لئے پولیس کے بشمول اسکواڈ تشکیل دیاجائے گا۔ انہوں نے یہ بھی کہاکہ غیرمجاز تعمیرات کی اطلاع دینے والو ں کو دس ہزارروپئے انعام دیاجائے گا۔ انہوں نے کہاکہ جی ایچ ایم سی کے حدود میں اٹھائیس ہزار غیرمجاز تعمیرات کی نشاندہی کی گئی ہے اوران کے خلاف سخت کاروائی کی جائے گی۔بارش سے پیدا حالات پر حکومت کو تنقید کانشانہ بنانے والی کانگریس اورتلگودیشم پربرہمی ظاہر کرتے ہوئے وزیراعلیٰ نے کہاکہ ان کی ہی غلطیوں کی وجہ سے آج شہر کے ایسے حالات ہوئے ہیں۔ اپنی غلطی پرآج وہ احتجاج کررہے ہیں۔
وزیراعظم نے فوج ‘ بحریہ اور فضائیہ کے اعلی عہدیداروں کے ساتھ جائزہ اجلاس منعقد کیا

وزیراعظم نے فوج ‘ بحریہ اور فضائیہ کے اعلی عہدیداروں کے ساتھ جائزہ اجلاس منعقد کیا



وزیراعظم نریندر مودی نے اری دہشت گرد حملہ کے تناظر میں ایک بار پھر فوج ‘ بحریہ اور فضائیہ کے اعلی عہدیداروں کے ساتھ جائزہ اجلاس منعقد کیا۔ وزیر اعظم نے گزشتہ اتوار کو ہوئے حملہ سے پیدا صورتحال پر بھی تبادلہ خیال کیا اور وادی کشمیر کی صورتحال کا بھی جائزہ لیا ۔ اس اجلاس میں فوج کے سربراہ جنرل دلبیر سنگھ سہاگ ‘ بحریہ کے سربراہ ایڈمیرل سنیل لامبا اور فضائی کے سربراہ اروپ راہا کے علاوہ قومی سلامتی کے مشیر اجیت دوول بھی موجود تھے ۔
فرانس کے ساتھ صرف چھتیس رافیل جٹ طیاروں کی خریدی ہندوستانی فضائیہ کے لئے کافی نہیں

فرانس کے ساتھ صرف چھتیس رافیل جٹ طیاروں کی خریدی ہندوستانی فضائیہ کے لئے کافی نہیں



سابق مرکزی وزیر دفاع اور کانگریس لیڈر اے کے انتونی نے کہا ہے کہ فرانس کے ساتھ صرف چھتیس رافیل جٹ طیاروں کی خریدی ہندوستانی فضائیہ کے لئے کافی نہیں ہے ۔ میڈیا سے بات کرتے ہوئے انتونی نے کہا کہ ایک سو چھبیس طیاروں کی خریدی کیلئے بات ہورہی تھی لیکن صرف چھتیس طیارے ہی خریدے گئے ۔ انہوں نے کہا کہ کیا اس معاملہ پر وزارت فینانس کے ساتھ بھی مشورہ کیا گیا تھا ۔ انہوں نے یہ بھی کہا کہ یو پی اے کے دور میں بی جے پی کے اعلی قائدین بشمول یشونت سنہا نے بھی اس معاہدہ پر سوال اٹھائے تھے ۔انہوں نے کہا کہ ہندوستانی فضائیہ کی ضروریات کیلئے کم سے کم ایک سو چھبیس طیارے درکار ہیں۔
تلنگانہ: اہم ذخائر آب ،تالابوں اور کنٹوں میں پانی کی سطح خطرے کے نشان تک پہنچ گئی

تلنگانہ: اہم ذخائر آب ،تالابوں اور کنٹوں میں پانی کی سطح خطرے کے نشان تک پہنچ گئی



تلنگانہ میں جاری بارش سے ریاست کے اہم ذخائر آب ،تالابوں اور کنٹوں میں پانی کی سطح خطرے کے نشان تک پہنچ گئی ہے۔ سری رام ساگر ،جورالا پراجکٹ، لکشمی کنال، سرسوتی کنال، سنگور ،مانجرا، گوداوری ،کرشنا، کڈم پراجکٹ میں پانی کی سطح خطرے کے نشان تک پہنچ گئی ہے۔ مختلف ذخائر آب اورپراجکٹس سے پانی کے اخراج کا عمل جاری ہے۔ آئندہ پانچ دنوں تک شدید بارش کی پیش قیاسی کے پیش نظر مقامی انتظامیہ کی طرف سے کافی چوکسی اختیارکی گئی ہے۔
تعطیل کے اعلان کے باوجود بھی بیگم پیٹ میں راگھویندرااسکول کی بس پانی میں پھنس گئی۔

تعطیل کے اعلان کے باوجود بھی بیگم پیٹ میں راگھویندرااسکول کی بس پانی میں پھنس گئی۔



حکومت کی طرف سے بارش کے باعث جی ایچ ایم سی کے حدودتعلیمی اداروں کو تعطیل کے اعلان کے باوجود بھی بیگم پیٹ کے بھوانی نگر میں راگھویندرااسکول کی بس بچوں کو اسکول لیے جانے کے دوروان پانی میں پھنس گئی۔ اس بس میں چالیس طلباء سوار تھے تاہم مقامی عوام نے چوکسی کامظاہرہ کرتے ہوئے بس کو ڈھکیل کر پانی سے باہرنکالا۔ سرپرستوں اور مقامی عوام نے اسکول انتظامیہ کے رویے پر برہمی کا اظہارکیاہے۔ بچے پوری طرح سے محفوظ بتائے گئے ہیں۔
تلنگانہ کے مختلف اضلاع میں بھی شدید بارش

تلنگانہ کے مختلف اضلاع میں بھی شدید بارش



اُدھر نظام آباد ،ورنگل،میدک ، نلگنڈہ، محبوب نگر، اور کھمم میں بھی شدید بارش کا سلسلہ جاری ہے۔ نظام آبادمیں گاڑی کے پانی میں پھنس جانے سے ایک خاتون اور اس کا کمسن بچہ بہہ گئے ہیں۔ اس سلسلے میں ماں اور بچے کی تلاش کے لئے مہم شروع کردی گئی ہے۔ سدی پیٹ میں مکان گرنے سے ایک شخص کی موت ہوگئی ہے۔ ضلع میدک میں بھی بارش کی وجہ سے بعض مکانات کے مہندم ہونے کی اطلاعات ملی ہیں۔ کریم نگر میں شدید بارش سے ذخائر آب لبریز ہوگئے ہیں۔ دونوں تلگوریاستوں میں بارش کی وجہ سے ہلاک ہونے والوں کی تعداد پیچس سے تجاویز کرگئی ہے۔تلنگانہ میں ضلع میدک بارش سے شدید متاثر ہوا ہے۔ گذشتہ چوبیس گھنٹوں کے دوران گیارہ سنٹی میٹر بارش ریکار ڈ کی گئی ہے۔ تلنگانہ اورآندھراپردیش میں جاری بارش کی وجہ سے کئی ٹرینوں کو منسوخ کردیاگیاہے۔ اس دوران اطلاع ملی ہے کہ مانجراذخیرآب میں بارش کے پانی کی وجہ سے تیس مزدور پھنس گئے ہیں۔ بعض مزدوروں کے پانی میں بہنے کی بھی اطلاعات ملی ہیں۔
کشمیر میں عوامی زندگی کے مفلوج ہونے کا اٹھیتر واں دن

کشمیر میں عوامی زندگی کے مفلوج ہونے کا اٹھیتر واں دن



کشمیر میں عوامی زندگی کے مفلوج ہونے کا اٹھیتر واں دن ہے۔ دوسری طرف وادی میں کہیں بھی کرفیو نہیں ہے ۔ تاہم امتناعی احکامات پر عمل جاری ہے ۔ نو جولائی سے برہان وانی کی ہلاکت کے بعد احتجاجی مظاہروں اور پولیس کی کارروائی میں اب تک ستیاسی افراد جاں بحق ہوچکے ہیں۔ گزشتہ روز بارہمولا ضلع میں بائیس سالہ نوجوان وسیم لون پولیس کی فائرنگ میں جاں بحق ہوگیا تھا ۔ پولیس کا کہنا ہے کہ فوج کی گاڑی پر سنگباری کے دوران وسیم کی موت ہوئی ہے ۔ مقامی عوام نے الزام لگایا کہ پولیس کی طرف سے اشتعال انگیز کارروائی کرتے ہوئے کھیتو ں میں کام کرنے والے وسیم کو نشانہ بنایا گیا ۔ وادی میں آج بھی تعلیمی ‘ کاروباری ادارے بند نظر آئے ۔
حیدرآبادمیں بارش کا سلسلہ جاری۔مزید پانچ دن خطرہ برقرار

حیدرآبادمیں بارش کا سلسلہ جاری۔مزید پانچ دن خطرہ برقرار



تلنگانہ کے دارالحکومت حیدرآبادمیں بارش سے پیداصورتحال سے نمٹنے کے لئے فوج اور این ڈی آرایف کی طرف سے سرگرمیاں شرو ع کردی گئی ہیں۔ شہر کے بیگم پیٹ، نظام پیٹ، الوال، کوکٹ پلی، امیر پیٹ، اپل، اوررامنتا پور میں سڑکوں اورنیشبی علاقوں میں پانی کی نکاسی کا عمل جاری ہے۔ گذشتہ رات سے آج صبح تک بھی وقفے وقفے سے بارش کا سلسلہ جاری تھا۔ محکمہ موسمیات نے پیش قیاسی کی ہے کہ آئندہ پانچ دنوں تک وقفے وقفے سے بارش کا سلسلہ جاری رہ سکتاہے۔این ڈی آرایف اور فوج کی ٹیموں نے الوال اور اوپل کے علاقوں میں امدادی سرگرمیوں میں حصہ لیا۔ الوال کے کئی علاقوں میں راحت کاری کے کاموں کے لئے فوج کی خدمات حاصل کی جارہی ہیں۔ فوج کو الوال پولیس اسٹیشن میں تیاررکھاگیاہے۔ نظام پیٹ، بیگم پیٹ، پاٹی گڈہ ،پرکاش نگر، آلوین کالون، راج بھون اور آنند تھیٹر کے علاقے شدید متاثر ہیں۔ کرنل دیش پانڈے کی نگرانی میں فوج کی چار ٹیموں نے کام شروع کردیاہے۔ کشتوں کے علاوہ طبی آلات اور دیگر ضروری سامان کے ساتھ نظام پیٹ اور الوال میں تعینات کیاگیاہے۔ جی ایچ ایم سی کے صدر دفتر میں کنٹرول روم بھی قائم کیاگیاہے جہاں سے حالات پر نظررکھی جارہی ہے۔
دوسری طرف فوج کی طرف سے حیدرآباد کے بارش سے متاثرہ علاقوں میں امدادی سرگرمیاں شروع کردی گئی ہیں۔ فوج کے جوانوں نے بیگم پیٹ کے بارش سے متاثرہ علاقوں میں امدادی سرگرمیوں میں حصہ لیا اورمتاثرین میں ضروری اشیاء بھی تقسیم کئیں۔ متاثرہ عوام کے طبی معائنہ بھی کئے جارہے ہیں اورانہیں دوائیں بھی تقسیم کی جارہی ہیں۔ واضح رہے کہ بارش کی وجہ سے حیدرآباد کے بیگم پیٹ ،نظام پیٹ، اوردوسرے علاقوں میں عوام کو کافی مشکلات کا سامنا کرنا پڑرہا ہے۔

Friday, 23 September 2016

Thursday, 22 September 2016

آندھراپردیش کے کئی اضلاع میں بھی شدید بارش

آندھراپردیش کے کئی اضلاع میں بھی شدید بارش



اُدھر آندھراپردیش کے کئی اضلاع میں بھی شدید بارش ہورہی ہے۔ گنٹورمیں بارش کی وجہ سے عام زندگی مفلوج ہوکررہ گئی ہے۔ ضلع کے کئی کنٹے اور تالاب پوری طرح سے لبریز ہوچکے ہیں۔ کھڑی فصلوں کو بھی نقصان پہنچانے کی اطلاعات مل رہی ہیں۔ محکمہ موسمیات کے مطابق آندھراپردیش کے بیشتر اضلاع میں بارش کا سلسلہ آئندہ چوبیس گھنٹوں تک جاری رہ سکتاہے۔
حیدرآباد : شہر میں جاری مسلسل بارش سے سڑکیں دن بدن ابتر ہوتی جارہی ہیں

حیدرآباد : شہر میں جاری مسلسل بارش سے سڑکیں دن بدن ابتر ہوتی جارہی ہیں



شہر میں جاری مسلسل بارش سے سڑکیں دن بدن ابتر ہوتی جارہی ہیں۔ منگل کی رات ہوئی موسلادھار بارش کے بعد شہر کے کوکٹ پلی ‘ نظام پیٹ ‘ بیگم پیٹ ‘ امیر پیٹ ‘ پنجہ گٹہ ‘ دلسکھ نگر ‘ ملک پیٹ ‘ مہدی پٹنم ‘ ٹولی چوکی ‘ نامپلی ‘ جوبلی ہلز ‘ بنجارہ ہلز ‘ الوال ‘ عنبرپیٹ ‘ نکلس روڈ اور سکندرآباد کے کئی علاقوں میں سڑکیں راہرو عوام کیلئے خطرہ کا باعث بن چکی ہیں۔ بائیکس اور گاڑیاں چلانے والوں کو ہمیشہ یہ خطرہ لگارہتا ہے کہ کیا وہ سلامتی سے گھر پہونچ پائیں گے ۔ دو دن کی بارش کے بعد شہر کے کئی علاقے اب بھی جھیل اور تالاب کا منظر پیش کررہے ہیں۔ سڑکوں سے پانی کی نکاسی کا عمل بہت ہی سست رفتاری سے جاری ہے ۔ بھلے ہی جی ایچ ایم سی حکام کی طرف سے چوبیس گھنٹے حالات پر نظر رکھی جارہی ہے ۔ لیکن برانڈ حیدرآباد کی امیج کو اس سے نقصان پہونچ رہا ہے ۔ یہ بھی نہیں کہا جاسکتا ہے کہ راتوں رات پانی کی نکاسی کا عمل پورا کرلیا جائے گا لیکن سڑکوں پر پڑے گڑھے عوام کیلئے خطرہ کا باعث بن گئے ہیں۔ کئی حادثے سڑک پر پڑے گڑھوں کی وجہ سے بھی پیش آتے ہیں ۔ چھوٹی گلیوں اور اپارٹمنٹس میں پانی کے جمع ہوجانے سے عوام گھروں میں محصور ہوکر رہ گئے ہیں۔ پانی میں چلتے ہوئے انہیں اپنے کام کاج کرنے پڑ رہے ہیں۔ گزشتہ روز نکلس روڈ پر گڑھا پڑ گیا ۔ لیکن وہاں پر ٹریفک کی آمد و رفت کم تھی جس کی وجہ سے بڑا حادثہ ٹل گیا ۔ عنبرپیٹ ودیا نگر روڈ پر ریتی کی لاری ناقص سڑک کے گڑھے میں پھنس گئی جس کی وجہ سے ٹریفک گھنٹوں جام رہی ۔ بارش کے بعد ان دنوں ٹریفک کا جام ہونا عام بات ہوگئی ہے ۔ شام کے اوقات میں دفتر اپنے کاروبار سے واپس ہونے والوں کو مشکلات کا سامنا کرنا پڑ رہا ہے ۔ ہر طرف ٹریفک جام ہے ۔ ٹریفک کی بحالی کیلئے پولیس اقدامات تو کررہی ہے لیکن مستقبل میں ایسی صورتحال کا سامنا نہ کرنا پڑے ایسے اقدامات کئے جانے چاہئیں ۔ بلدی عملہ کو چوکس رکھتے ہوئے پانی کی نکاسی کے عمل کو فوری انجام دینے کی ضرورت ہے ۔ عوام خراب سڑکوں اور ٹریفک کی وجہ سے کئی مشکلات سے دوچار ہیں۔ دو گھنٹے کی بارش سے شہر میں زندگی ٹھپ ہورہی ہے ۔ انتظامیہ کو چاہئے کہ مستقبل میں بہتر سڑکوں کی تعمیر کو یقینی بنائیں اور پانی کی نکاسی کیلئے بھی سنجیدہ اقدامات کئے جائیں ۔
حیدرآباد : کے ٹی راما راؤ نے آج بارش سے متاثرہ علاقوں کا دورہ کیا

حیدرآباد : کے ٹی راما راؤ نے آج بارش سے متاثرہ علاقوں کا دورہ کیا



ریاستی وزیر بلدی نظم ونسق کے ٹی راما راؤ نے آج بارش سے متاثرہ علاقوں کا دورہ کیا۔ کے ٹی آر نے کئی علاقوں میں نالوں کا بھی معائنہ کیا۔ ان کے ہمراہ میئر بی رامن موہن اور کمشنر بلدیہ بی جناردھن ریڈی بھی موجود تھے۔ کمشنر بلدیہ نے عہدیداروں کو ہدایت کہ مزید بارش کی پیش قیاسی کے پیش نظر نشیبی علاقوں سے عوام کا تخلیہ کرایاجائے۔کے ٹی آر نے نظام پیٹ کے علاقے کا دورہ کیا اورمتاثرہ مقامات پر عوام سے ملاقات کی۔ بعض اپارٹمنٹس کا بھی کے ٹی آر نے دورہ کیا۔ انہوں نے عوام سے بھی اپیل کی کہ بارش کے پیش نظر نشیبی علاقوں میں کافی محتاط رہیں۔
حیدرآباد شہر میں آج دوپہر ایک بار پھر شدید بارش

حیدرآباد شہر میں آج دوپہر ایک بار پھر شدید بارش



حیدرآباد شہر میں آج دوپہر ایک بار پھر شدید بارش ہوئی ہے۔ دونوں شہروں میں بارش کے بعد سڑکوں پر پانی کی تیزبہاؤ دیکھاگیا۔ کوکٹ پلی ، کشائی گوڑہ، الوال، نظام پیٹ، پنجہ گٹہ، بنجارہ ہلز ،نامپلی، کوٹھی، سعید آباد ،دلسکھ نگر، مہدی پٹنم، ٹولی چوکی، نامپلی، چارمینار، یاقوت پورہ، چندرائن گٹہ، ملک پیٹ، بارکس، ترمل گریری، بلارم،اوپل ،ونستھلی پورم، خیریت آباد،سوماجی گوڑہ اور دوسرے مقامات پرشدیدبارش ہوئی ہے۔ دوپہر کے مصروف اوقات میں ایکبارپھر بارش سے ٹریفک کئی مقامات پر جام دیکھی گئی۔ پرانے شہر کے کئی نشیبی علاقے پانی میں ڈوبے ہوئے پائے گئے۔ واضح رہے کہ محکمہ موسمیات نے آئندہ تین دنوں تک تلنگانہ میں شدید بارش کی پیش قیاسی کی ہے۔ شہر کے کئی تالابوں میں پانی کا تیز بہاؤ دیکھاگیا۔ حسین ساگرمیں بھی ایک بار پھر پانی کی سطح میں اضافہ کی اطلاعا ت ملی ہیں۔ حسین ساگر سے مسلسل پانی کا اخراج جاری ہے۔
کشمیر کے اننت ناگ میں آج پھر سے کرفیو

کشمیر کے اننت ناگ میں آج پھر سے کرفیو



کشمیر کے اننت ناگ میں آج پھر سے کرفیو نافذ کردیا گیا ہے ۔ سری نگر سٹی کے تین پولیس اسٹیشن میں پہلے سے ہی کرفیو پر عمل جاری ہے ۔ بتایا گیا ہے کہ علحدگی پسند تنظیموں کی طرف سے آج احتجاجی ریالی نکالنے کا اعلان کیا گیا تھا ۔ وادی میں آج چھیتر ویں دن بھی عام زندگی مفلوج دیکھی گئی ۔ کئی علاقوں میں امتناعی احکامات پر بھی عمل جاری ہے ۔ علحدگی پسند تنظیموں کی طرف سے اننت ناگ اور سری نگر میں احتجاجی ریالی نکالنے کا اعلان کیا گیا تھا اسی کے پیش نظر اننت نگر میں پولیس نے کرفیو نافذ کیا ہے ۔ احتجاجیوں نے اپنے پروگرام کو انتیس ستمبر تک توسیع کردی ہے ۔ تعلیمی اور کاروباری ادارے وادی میں بند رہے جبکہ پٹرول پمپ بھی بند دیکھے گئے ۔ گزشتہ چھیتر دن سے وادی میں جاری کشیدہ صورتحال ‘ کرفیو اور امتناعی احکامات سے عوام کو شدید مشکلات کا سامنا کرنا پڑ رہا ہے ۔ آٹھ جولائی کو سکیوریٹی فورسس کے ہاتھوں حزب المجاہدین کے کمانڈر برہان وانی کی ہلاکت کے بعد تشدد پھوٹ پڑا تھا اور پولیس کی کارروائیو ں میں اکیاسی سے زائد افراد جاں بحق ہوچکے ہیں۔ اس دوران اطلاع ملی ہے کہ جموں و کشمیر ہائی کورٹ نے پائلٹ گنس پر پابندی لگانے سے انکار کردیا ہے ۔
پاکستان کے باربار کھلنے والے منہ کو بند کرنا چاہیے : سنجے راوت

پاکستان کے باربار کھلنے والے منہ کو بند کرنا چاہیے : سنجے راوت



شیو سینا کے سینئر لیڈر سنجے راوت نے کہا کہ جنرل اسمبلی میں پاکستان کے باربار کھلنے والے منہ کو بند کرنا چاہیے۔ میڈیا سے بات کرتے ہوئے سنجے راوت نے کہا کہ صرف باتوں سے پاکستان کا منہ بندنہیں کیاجاسکتابلکہ اس کے خلاف سخت کاروائی کرنی ہوگی۔ سنجے وارت نے کہا کہ پاکستان کو یکاوتنہا کرنے کے علاوہ اسے اس کی زبان میں جواب دینا ہوگا۔
مودی کے روپ میں ملک کی عوام نے ایک طاقتور وزیر اعظم کو دیکھا : رام دیو

مودی کے روپ میں ملک کی عوام نے ایک طاقتور وزیر اعظم کو دیکھا : رام دیو



یوگا گرو رام دیو نے کہا ہے کہ نریندر مودی کے روپ میں ملک کی عوام نے ایک طاقتور وزیر اعظم کو دیکھا ہے ۔ اگر وزیر اعظم پاکستان کو اس کی زبان میں جواب نہیں دیتے ہیں تو ملک میں مایوسی چھا جائے گی ۔ میڈیا سے بات کرتے ہوئے رام دیو نے کہا کہ پاکستان کو دہشت گرد ملک قرار دینے کے سفارتی عمل کو جاری رکھتے ہوئے پہلا کام یہ کریں کہ پاکستان کے مقبوضہ کشمیر میں موجود دہشت گردوں کے ٹھکانوں کو تباہ کیا جائے ۔
کشمیر میں ہورہی ہلاکتوں کی تحقیقات کا مطالبہ

کشمیر میں ہورہی ہلاکتوں کی تحقیقات کا مطالبہ



پاکستان کے وزیر اعظم نواز شریف نے کشمیر میں ہورہی ہلاکتوں کی اقوام متحدہ کے حقائق جاننے والے مشن کے ذریعہ تحقیقات کا مطالبہ کیا ہے ۔ اقوام متحدہ کی جنرل اسمبلی کے اجلاس سے خطاب کرتے ہوئے نواز شریف کا کہنا تھا کہ پاکستان ہندوستان کے ساتھ امن چاہتا ہے اور بات چیت دونوں ممالک کے مفاد میں ہے ۔ لیکن کشمیر کے مسئلہ کو حل کئے بغیر امن ممکن نہیں ہوسکتا ۔ نواز شریف نے یہ بھی کہا کہ ہندوستان کی طرف سے مذاکرات کیلئے پیشگی شرائط رکاوٹ بن رہے ہیں۔ نواز شریف نے ہندوستان کو تمام متنازعہ مسائل پر مذاکرات کی دعوت دی ۔ ان کا یہ بھی کہنا تھا کہ ہندوستان ہتھیار جمع کررہا ہے اور پاکستان کو اس پر کافی تشویش ہے ۔ نواز شریف نے حزب المجاہدین کے کارکن برہان وانی کی ہلاکت کا بھی ذکر کیا اور کہا کہ برہان وانی کشمیریوں کے ہندوستانی قبضہ کے خلاف نئی انتقاضہ تحریک کی علامت بن چکا ہے ۔
برہان وانی کو نوجوان رہنما کرنے پر ہندوستان کا شدید ردعمل

برہان وانی کو نوجوان رہنما کرنے پر ہندوستان کا شدید ردعمل



ہندوستان نے جنرل اسمبلی میں پاکستانی وزیر اعظم نواز شریف کی تقریر پر سخت اعتراض کیا ہے ۔ ہندوستانی وزارت خارجہ کے مملکتی وزیر ایم جے اکبر نے برہان وانی کو نواز شریف کی طرف سے نوجوان رہنما کہنے پر بھی اعتراض کیا ۔ میڈیا سے بات کرتے ہوئے ایم جے اکبر نے کہا کہ یہ حیرانی کی بات ہے کہ پاکستان ایک دہشت گرد کو ہیرو قرار دے رہا ہے ۔ کشمیر میں خونی کھیل کھیلنے والے دہشت گرد برہان وانی کی تعریف کرتے ہوئے پاکستان خود کو دہشت گردی کا حامی ثابت کررہا ہے ۔ انہوں نے کہا کہ پاکستان دہشت گردی کی حوصلہ افزائی کررہا ہے ۔ ان کا یہ بھی کہنا تھا کہ ایک ملک کا بڑا لیڈر ایسے پلاٹ فارم سے دہشت گردی کا پروپگنڈہ کررہا ہے ۔ پاکستان ایک حکومت کی طرح نہیں بلکہ وار جنگی کے طور پر کام کررہا ہے ۔ ایم جے اکبر نے یہ بھی کہا کہ پاکستان ہندوستان سے بات کرنا چاہتا ہے لیکن ہاتھ میں بندوق ساتھ میں رکھ کر دہشت گردی اور دوستی ایک ساتھ نہیں چل سکتے ۔

Wednesday, 21 September 2016