Thursday, 31 March 2016

Wednesday, 30 March 2016

 مسلمانوں کو بھی ایس سی اور ایس ٹی کے مماثل مراعات فراہم  کی جائیں

مسلمانوں کو بھی ایس سی اور ایس ٹی کے مماثل مراعات فراہم کی جائیں



قائد مجلس اکبرالدین اویسی اسمبلی میں مسلسل مسلمانوں کو بھی ایس سی اور ایس ٹی کے مماثل مراعات فراہم کرنے کا مطالبہ کرتے آرہے ہیں۔ حکومت نے اکبراویسی کے مطالبہ پر اس سلسلہ میں احکام جاری کرنے کا بھی تیقن دیا ہے اگر حکومت احکام جاری کرتی ہے تو مسلمانوں کو کئی شعبہ جات میں غیرمعمولی فائدہ ہوگا۔ احکام کی اجرائی سے مسابقتی امتحانات میں مسلمانوں کیلئے فیس کم ہوگی ‘ اسکالر شپس کی رقم میں اضافہ ہوگا۔ اقامتی اداروں میں تعلیم‘ اسکول یونیفارم اور کتابیں مفت فراہم کی جائیں گی۔ میس اور کاسمیٹکس چارجس بھی حاصل ہوں گے۔ ملازمتوں کیلئے منعقد ہونے والے امتحانات میں کامیابی کیلئے نشانات میں بھی کمی ہوگی۔ ملازمتوں کے حصول کیلئے حد عمر میں بھی رعایت رہے گی۔ حکومت کی طرف سے احکام جاری کرنے کے بعد ہی رہنمایانہ خطوط وضع ہونے پر یہ پتہ چلے گا کہ کونسی مراعات مسلمانوں کو فراہم کی جائیں گی ۔
زہر آلو د مواد کے ذریعہ پھلوں کو پکانے کے خلاف پولیس کی سخت مہیم ، سات افراد گرفتار

زہر آلو د مواد کے ذریعہ پھلوں کو پکانے کے خلاف پولیس کی سخت مہیم ، سات افراد گرفتار



ساوتھ زون پولیس نے زہرآلود مواد کے ذریعہ پھلوں کو پکاکر عوام کی جانوں سے کھیلنے والوں کے خلاف مہم شروع کردی ہے۔ پولیس نے چندرائن گٹہ‘ فلک نما‘ نیاپل‘ بھوانی نگر‘ مغلپورہ‘ بنڈلہ گوڑہ میں مختلف گوداموں پر دھاوے کرتے ہوئے سات افراد کو گرفتار کیا اور زہرآلود مواد کے ذریعہ پکائے گئے پھلوں کی بھاری مقدار کو ضبط کرتے ہوئے کئی گوداموں کو مہربند کردیا ہے۔ ڈی سی پی ساوتھ زون نے بتایا کہ نہ صرف پھلوں کو ناجائز طریقہ سے پکایا جارہا ہے بلکہ ان میں خوبصورت و چمک لانے کیلئے بھی مہلک کمیکل کا چھڑکاؤ کیا جارہا ہے جس سے ہزاروں افراد بالخصوص بچے مختلف قسم کی بیماریوں میں مبتلا ہورہے ہیں۔ ڈی سی پی نے بتایا کہ مہلک مواد سے خود پھلوں کا کاروبار کرنے والے افراد اور ملازمین کی بھی جانوں کو خطرہ ہے ۔ انہوں نے ساوتھ زون کے پھلوں کے تاجرین کو انتباہ دیا کہ وہ چند روپیوں کی خاطر خود کی اور عوام کی جانوں کو خطرہ میں نہ ڈالیں بصورت دیگر ان کے خلاف سخت ترین کاروائی کی جائے گی۔ ایڈیشنل ڈی سی پی بابو راو بھی اس موقع پر موجود تھے ۔
شہر  حیدرآباد  میں کچرے کے انبار

شہر حیدرآباد میں کچرے کے انبار



شہر میں کچرے کے انبار اس بات کا ثبوت ہیں کہ مئیر حیدرآباد رام موہن نے اپنے عہدہ کا جائزہ حاصل کرنے کے بعد موثر طریقہ سے کام شروع نہیں کیا ہے ۔ وہ شہر کے مختلف علاقوں میں اہم سڑکوں کا دورہ کرکے کچرا اٹھانے کے کاموں کا جائزہ لے کر ضروری ہدایت تو دے رہے ہیں لیکن صرف سڑکوں کے پاس پڑا ہوا کچرا اٹھانے سے بات نہیں بنتی ۔ ضرورت اور اہم بات یہ ہے کہ مختلف محلہ جات ‘ بستیوں ‘ سلم علاقوں کا بھی دورہ کیا جائے جہاں کوڑے دان کا کچرا پھیل کر سڑکوں پر آرہا ہے جس سے راستہ چلنے والوں کو مشکلات پیش آنے کے علاوہ فضا میں تعفن پھیل گیاہے۔اس سے مچھروں اور مہلک وائرس کی افزائش ہورہی ہے۔ وجئے نگر کالونی‘ جھرہ‘ آصف نگر کے علاوہ شہر کے ایسے کئی محلہ جات ہیں جہاں کچرے کے انبار لگے ہیں۔ ایک تو موسم گرما کی راتیں نسبتاً ٹھنڈی ہونے کی وجہ سے سوائن فلو کے وائر سکی افزائش ہورہی ہے جبکہ شدید گرمی کی وجہ سے یہ وائرس ختم ہونے کے بجائے ابھی بھی پھیل رہا ہے۔ ایک ہفتہ پہلے سوائن فلو کی وجہ سے دو اموات ہوچکی ہیں۔ مئیر حیدرآباد اور شہر کی بستیوں کا بھی دورہ کریں گے تو یہ بات وقت کی ضرورت کے مطابق ہوگی۔ موسم گرما میں بھی موسمی بخار کی وجہ سے لوگ بیمار پڑتے ہیں۔ مئیر حیدرآباد اگر صاف صفائی کیلئے ایک جامع پروگرام بناکر سختی سے عمل آوری کریں گے تو کچرے سے متعلق مسائل کی یکسوئی ہوسکتی ہے ۔
کنیڈا: طیارہ حادثہ میں وزیر ٹرانسپورٹ اور انکی اہلیہ و تین بچے ہلاک

کنیڈا: طیارہ حادثہ میں وزیر ٹرانسپورٹ اور انکی اہلیہ و تین بچے ہلاک



کنیڈا میں چھوٹا مسافر طیارہ گر کر تباہ ہوگیا ہے ۔ اس حادثہ میں ملک کے وزیر ٹرانسپورٹ ‘ ان کی اہلیہ اور تین افراد خاندان بھی ہلاک ہوگئے ہیں ۔ حادثہ میں پائلٹ کی موت بھی واقع ہوئی ہے ۔ بتایا گیا ہے کہ کنیڈا کے وزیر ٹرانسپورٹ اپنے والد کی آخری رسومات میں شرکت کیلئے صوبہ کیوبک جارہے تھے ۔ کنیڈا کے محکمہ ٹرانسپورٹ نے حادثہ کی تحقیقات شروع کردی ہے تاہم خراب موسم کی وجہ سے امدادی کاموں میں رکاوٹ آرہی ہے ۔
ٹہری ہوئی ٹرین کے لوکو شیڈ اے سی کوچ میں آگ لگ گئی

ٹہری ہوئی ٹرین کے لوکو شیڈ اے سی کوچ میں آگ لگ گئی



شہر حیدرآباد کے نامپلی ریلوے اسٹیشن میں ٹہری ہوئی ٹرین کے لوکو شیڈ اے سی کوچ میں آگ لگ گئی ۔ اس واقعہ میں ایک بوگی مکمل طورپر جل کرخاکسترہوگئی ۔ریلویز کے عہدیداروں نے فوری طورپر فائر بریگیڈ کے اہل کاروں کو اس بات کی اطلاع دی جس کے بعد فائر بریگیڈ کے اہل کار وہاں پہنچے اور آگ پر قابو پایا۔ریلویز کے عہدیداروں نے شبہ ظاہر کیا ہے کہ شارٹ سرکٹ سے یہ آگ لگی ۔اس واقعہ میں کوئی جانی نقصان نہیں ہوا۔یہ ٹرین مرمت کے لیے ریلوے یارڈ کے شیڈ میں ٹہرائی گئی تھی کہ اس میں اچانک آگ لگ گئی۔ریلوے پولیس نے اس سلسلہ میں ایک معاملہ درج کرلیا۔یہ واقعہ آج صبح پیش آیا۔ریلوے کے افسر مقام واقعہ پر پہنچ گئے ۔فارنسک ٹیم بھی پہنچ گئی ۔ریلوے کے عہدیداروں کی جانب سے ریلوے یارڈ کے انچارج سے تفصیلات حاصل کی جارہی ہیں۔اس واقعہ میں ایک بوگی جل کر مکمل طورپر خاکستر ہوگئی جبکہ دوسری بوگی کو معمولی طورپر نقصان ہوا۔ریلوے کے ملازمین کی چوکسی سے ایک بڑا حادثہ ٹل گیا ورنہ بڑے پیمانے پر نقصان کا خدشہ تھا۔ریلوے کے عہدیداراس بات کی بھی جانچ کر رہے ہیں کہ کسی نے ٹرین کو جان بوجھ کر آگ لگائی یا شارٹ سرکٹ سے آگ لگی ۔
اسکول بس بریک فیل ہوجانے سے حادثہ کا شکار

اسکول بس بریک فیل ہوجانے سے حادثہ کا شکار



گنٹور میں بھی خانگی اسکول بس بریک فیل ہوجانے سے حادثہ کا شکار ہوگئی۔ اس حادثہ میں بعض طلباء زخمی ہوگئے۔ متاثرہ طلباء کے سرپرستوں نے اسکول انتظامیہ کو حادثہ کا ذمہ دار ٹھہراتے ہوئے برہمی کا اظہار کیا۔ پولیس نے کیس 
درج کیا ہے اور تحقیقات کی جارہی ہے ۔
ضلع رنگاریڈی :سڑک حادثہ میں سات افراد ہلاک

ضلع رنگاریڈی :سڑک حادثہ میں سات افراد ہلاک




ضلع رنگاریڈی کے پرگی کے حدود میں واقع رکم پلی گیٹ کے پاس آج صبح پیش آئے خوفناک سڑک حادثہ میں سات افراد ہلاک ہوگئے ۔ تفصیلات کے مطابق ڈی سی ایم ویان میں تقریباً بیس سے زائد افراد شادی کی تقریب میں جارہے تھے اچانک ان کی ویان اُلٹ گئی ۔ چار افراد برسر موقع ہلاک ہوگئے ۔ جبکہ پندرہ زخمی افراد کو حیدرآباد کے شاداں ‘ عثمانیہ دواخانوں کو منتقل کیا گیا تھا ۔ علاج کے دوران مزید تین افراد ہلاک ہوگئے ۔ مہلوکین کی شناخت نوین ‘ سنتوش ‘ شرنیا ‘ انوسویا ‘ لکشمی ‘ بچیا اور مانیا کی حیثیت سے کی گئی ہے ۔ وزیر اعلی کے چندر شیکھر راؤ نے اس حادثہ پر شدید افسوس کا اظہار کیا ہے ۔ وزیر اعلی نے متعلقہ حکام کو بھی ہدایت دی ہے کہ اس واقعہ کے مہلوکین کے افراد کی مدد کی جائے ۔ وزیر ٹرانسپورٹ مہیندر ریڈی نے بھی کہا ہے کہ زخمیوں کے علاج کیلئے ڈاکٹرس کو ہدایت دے دی گئی ہے ۔
پوچارم سرینواس ریڈی اور تلگودیشم رکن اسمبلی ریونت ریڈی کے درمیان نوک جھونک

پوچارم سرینواس ریڈی اور تلگودیشم رکن اسمبلی ریونت ریڈی کے درمیان نوک جھونک



تلنگانہ اسمبلی میں وزیر زراعت پوچارم سرینواس ریڈی اور تلگودیشم رکن اسمبلی ریونت ریڈی کے درمیان نوک جھونک دیکھی گئی ۔ تلنگانہ میں خشک سالی کی صورتحال اور پانی کی قلت کے مسئلہ پر مختصر مباحث کے دوران وزیر زراعت پوچارم سرینواس ریڈی نے کہا کہ ریاست میں کسانوں کی خودکشی کے واقعات کیلئے ٹی آر ایس حکومت ہی نہیں ماضی کی حکومتیں بھی ذمہ دار ہیں ۔ کیونکہ مناسب اقدامات ماضی کی ان حکومتوں کی جانب سے نہ کرنے کے سبب کسانوں نے خودکشی کی ہے۔ اگر ماضی کی حکومتیں اقدامات کرتیں تو خودکشی کے واقعات کا سلسلہ جاری نہیں رہتا جس پر مداخلت کرتے ہوئے تلگودیشم کے رکن اسمبلی ریونت ریڈی نے کہا کہ ماضی میں حکومتوں میں جو لوگ تھے آج بھی وہی لوگ حکومت میں ہے اور وزیر بنے ہوئے ہیں جس پر پوچارم سرینواس نے کہا کہ جب متحدہ آندھراپردیش میں اس وقت کے وزیر اعلی چندرا بابو نائیڈو نظام شوگر فیکٹری کی نجی کاری کررہے تھے تو اس وقت انہوں نے اس کی مخالفت کی تھی جس پر چندرا بابو نائیڈو نے انہیں مارا بھی تھا اور چندرا بابو نائیڈو نے بعد ازاں انہیں سمجھایا بھی تھا جس پر انہوں نے کہا تھا کہ یہ مار ان کے پیر پر نہیں بلکہ دل پر لگی ہے ۔ اس موقع پر کانگریس کے جیون ریڈی نے مداخلت کرتے ہوئے کہا کہ اس فیکٹری کی نجی کاری کی مخالفت کے باوجود پوچارم سرینواس ریڈی نے وزیر کے عہدہ سے استعفی کیوں نہیں دیا جس پر پوچارم سرینواس ریڈی نے کہا کہ جب متحدہ آندھراپردیش کے آخری وزیر اعلی کرن کمار ریڈی نے یہ کہا تھا کہ وہ تلنگانہ کیلئے ایک روپیہ بھی نہیں دیں گے تو کانگریس کے تلنگانہ کے لیڈروں نے استعفی کیوں نہیں دیا تھا ۔ اسی دوران ریونت ریڈی نے مداخلت کی اور کہا کہ جس نظام شوگر فیکٹری کیلئے پوچارم نے مار کھائی تھی اقتدار میں آنے کے بائیس ماہ کے باوجود اس شوگر فیکٹری کو بحال نہیں کیا گیا ۔ اس سے یہ صاف ظاہر ہوتا ہے کہ اس وقت بھی مارکھانے کے باوجود پوچارم سرینواس ریڈی کو عہدہ پیارا تھا اور آج بھی وہ تلنگانہ کے وزیر اعَلی کا ظلم عہدہ کیلئے برداشت کررہے ہیں ۔
خشک سالی سے اضلاع کے کسان اور عوام بھی متاثر

خشک سالی سے اضلاع کے کسان اور عوام بھی متاثر



مجلس کے رکن اسمبلی احمد بلعلہ نے خشک سالی اور پینے کے پانی کے مسئلہ پر مختصر مباحث میں حصہ لیتے ہوئے حیدرآباد اور سکندرآباد میں پانی کی شدید قلت پر تشویش کا اظہار کیا ہے ۔ احمد بلعلہ نے بتایا کہ خشک سالی سے اضلاع کے کسان اور عوام بھی متاثر ہوئے ہیں۔ کئی اضلاع میں ہفتہ میں ایک دن پانی سربراہ کیا جارہا ہے۔ احمد بلعلہ نے کہا کہ پرانے شہر کے کئی علاقوں میں ذخائر آب تعمیر تو کئے گئے لیکن ابھی تک وہاں سے پانی کی سربراہی شروع نہیں کی گئی ہے۔ رکن اسمبلی ملک پیٹ نے فاطمہ نگر ‘ فاروق نگر علاقوں کا حوالہ دیا اور یہ بھی بتایا کہ چارمینار میں بھی ذخیرہ آب کا کام مکمل نہیں ہوا ہے۔ رکن اسمبلی ملک پیٹ نے کہا کہ ٹنڈرس کیلئے بھی چھ مہینے لگ رہے ہیں ۔ پانی کی لائنیں بچھائی جاچکی ہیں لیکن ابھی تک سربراہی کا عمل شروع نہیں کیا گیا ہے ۔ رکن اسمبلی ملک پیٹ نے کہا کہ بورویلس کے مرمتی کاموں کیلئے بھی لاپرواہی برتی جارہی ہے۔ عہدیدار غیرذمہ داری سے کام کررہے ہیں جس سے مسئلہ اور بھی سنگین ہورہا ہے۔ رکن اسمبلی ملک پیٹ نے تجویز پیش کی کہ گوداوری اور کرشنا کے پانی کو علحدہ طور پر سربراہ کیا جائے۔ انہوں نے کہا کہ حکومت کی طرف سے اعلان کئے گئے سو دن کے ایکشن پلان پر موثر عمل آوری نہیں کی جارہی ہے ۔
بھوپال میں بھی ارکان اسمبلی کی تنخواہوں میں اضافہ کردیا گیا

بھوپال میں بھی ارکان اسمبلی کی تنخواہوں میں اضافہ کردیا گیا



بھوپال میں بھی ارکان اسمبلی کی تنخواہوں میں اضافہ کردیا گیا ہے ۔ ریاست کے کابینی وزیر نروتم مشرا نے بتایا ہے کہ کابینہ نے اس فیصلہ کو منظوری دی ہے ۔ ارکان اسمبلی کی تنخواہیں اب ایک لاکھ دس ہزار ماہانہ ہوجائے گی ۔ اس سے پہلے مدھیہ پردیش میں ارکان مقننہ کو ستر ہزار روپئے تنخواہ ادا کی جارہی تھی ۔ وزیر اعلی کی تنخواہ بھی تقریباً دو لاکھ روپئے کردی گئی ہے ۔ واضح رہے کہ مدھیہ پردیش کا بندیل کھنڈ علاقہ اس وقت شدید خشک سالی سے دوچار ہے اور کسان کافی پریشان بھی ہیں ۔
 فرقہ پرست طاقتیں آسام کی روایتی تہذیب کیلئے خطرہ ہیں

فرقہ پرست طاقتیں آسام کی روایتی تہذیب کیلئے خطرہ ہیں



کانگریس صدر سونیا گاندھی نے آج آسام میں پارٹی کی انتخابی مہم کا آغاز کردیا ہے ۔ ریاست کے شیو ساگر میں انتخابی ریالی سے خطاب کرتے ہوئے سونیا گاندھی نے کہا کہ آسام کی ملی جلی تہذیب اس وقت خطرہ میں ہے انہوں نے کہا کہ دو خطرناک طاقتیں ایک ہوکر ریاست کو خطرہ کی طرف ڈھکیلنے کی کوشش کررہی ہیں۔ سونیا گاندھی نے بی جے پی اور دیگر جماعتوں کا نام لئے بغیر یہ پارٹیاں کانگریس اس لئے مخالفت کرتے ہیں کیونکہ وہ یہ بات اچھی طرح سے جانتے ہیں کہ کانگریس آسامی سماج کے ہر طبقہ کی قیادت کرتی ہے ۔ انہوں نے آسام کے عوام سے اپیل کی کہ وہ انتخابات میں فرقہ پرست طاقتوں کے جھانسہ میں نہ آئیں اور کانگریس کو کامیاب کریں ۔
دلی واقعہ کی مختلف جماعتوں کے قائدین نے کی مذمت

دلی واقعہ کی مختلف جماعتوں کے قائدین نے کی مذمت



دینی مدرسہ کے طلبہ پر جئے ماتا کی اور بھارت ماتا کی جئے کے نعرے لگانے کا اصرار کرتے ہوئے کئے گئے حملہ کی مختلف قائدین اور تنظیموں نے مذمت کی ہے ۔ میڈیا سے بات کرتے ہوئے جے ڈی یو کے لیڈر کے سی تیاگی نے کہا کہ نریندر مودی کے اچھے دن اور سب کا ساتھ سب کا وکاس کی پول اس واقعہ سے کھل گئی ہے ۔ این سی پی کے لیڈر طارق انور نے بھی کہا کہ یہ فرقہ پرست عناصر کی کارروائی ہے ۔ اور ان کے خلاف کارروائی ہونی چاہئے ۔ لکھنو عیدگاہ کے امام رشید فرنگی محلی نے بھی اس واقعہ کی مذمت کی ہے اور کہا کہ ملک کے ماحول کو نعروں کو بنیاد بناکر متاثر کیا جارہا ہے ۔ رشید فرنگی نے بھی ذمہ دار افراد کے خلاف سخت کارروائی کا مطالبہ کیا ۔
دوسری طرف دہلی پولیس نے کہا ہے کہ زخمی اور متاثرہ دینی مدرسہ کے طلبہ نے جو بیان دیا ہے اس کے مطابق تحقیقات کی جارہی ہے ۔ دینی مدرسہ کے طلبہ پر حملہ کے سلسلہ میں جن پانچ لڑکوں کو گرفتار کیا گیا ہے ان کی عمریں بیس تا اکیس سال کے درمیان بتائی جارہی ہے اور یہ بھی طالب علم بتائے گئے ہیں ۔
دلی میں دینی مدرسہ کے طلباء کو جئے ماتا کی اور بھارت ماتا کی جئے نہ کہنے پر کیا گیا زدوکوب

دلی میں دینی مدرسہ کے طلباء کو جئے ماتا کی اور بھارت ماتا کی جئے نہ کہنے پر کیا گیا زدوکوب


بھارت ماتا کی جئے کے نعرہ نہ لگانے پر دہلی کے ایک مدرسہ کے تین طلبہ کوفرقہ پرست اشرار کی طرف سے شدید زدوکوب کئے جانے کا واقعہ پیش آیا ہے ۔ زخمی نوجوان محمد دلکش نے بتایا کہ چھبیس مارچ کو وہ قریبی پارک میں گئے تھے اسی وقت بعض افراد ان کے پاس آئے پہلے انہوں نے طمانچے رسید کئے اور ایک لڑکا کو پہلے جئے ماتا کی نعرہ لگانے کو کہا اور یہ بھی کہا کہ اگر وہ یہ نعرہ نہیں لگائیں گے تو انہیں قتل کردیا جائے گا ۔ دلکش نے بتایا کہ جب اس نے یہ نعرہ لگانے سے انکار کردیا تو اسے زدوکوب کیا گیا ۔ دلکش کے ایک اور ساتھی اجمل کو بھی زدوکوب کیا گیا لیکن وہ وہاں سے بھاگ کر بچ نکلنے میں کامیاب ہوگیا ۔ متاثرہ طلبہ نے فوری اپنے مدرسہ کے ٹیچر کواطلاع دی جنہوں نے فوری اس واقعہ کی پولیس میں شکایت درج کرائی ۔ دوسری طرف پولیس کی طرف سے تین افراد کو تحویل میں لئے جانے کی اطلاع ملی ہے ۔ واضح رہے کہ حالیہ چند دنوں میں بھارت ماتا کی جئے کے نعرہ کو لے کر فرقہ پرست تنظیمیں ماحول کو بگاڑنے کی کوشش کررہی ہیں اور دینی مدرسہ کے طلبہ پر بھی حملہ اسی کی ایک کڑی ہے ۔ دلکش کا ہاتھ ٹوٹ چکا ہے اور اس کو کئی زخم آئے ہیں۔ مدرسہ کے انتظامیہ نے قصوروار شرپسندوں کے خلاف سخت کارروائی کا مطالبہ کیا ہے ۔
بن لادن گروپ کے کئی ملازمین گزشتہ چھ ماہ سے تنخواہوں کی عدم ادائیگی سے پریشان

بن لادن گروپ کے کئی ملازمین گزشتہ چھ ماہ سے تنخواہوں کی عدم ادائیگی سے پریشان



سعودی عرب کی مشہور تجارتی کمپنی بن لادن گروپ کے کئی ملازمین گزشتہ چھ ماہ سے تنخواہوں کی عدم ادائیگی سے پریشان ہیں ۔ بتایا گیا ہے کہ ہندوستان ‘ پاکستان ‘ بنگلہ دیش ‘ مصر اور سری لنکا کے ملازمین کو چھ ماہ سے تنخواہیں ادا نہیں کی گئی ہیں ۔ ملازمین روزانہ کمپنی کے ہیڈ کوارٹر کے چکر کاٹ رہے ہیں ۔ بتایاگیا ہے کہ مرحلہ واری طور پر بعض ملازمین کو تنخواہیں ادا کی جارہی ہیں ۔ فہرست میں اپنا نام دیکھنے کیلئے بھی ملازمین کا ہجوم دیکھا جارہا ہے ۔ ملازمین نے بتایا ہے کہ تنخواہوں کی عدم ادائیگی سے نہ تو وہ مملکت میں اخراجات کو برداشت کرپارہے ہیں اور نہ ہی آبائی ملک میں اپنے افراد خاندان کو رقم بھیج پارہے ہیں ۔ ملازمین نے متعلقہ سفارتخانوں سے بھی اپیل کی ہے کہ اس سلسلہ میں ان کی مدد کی جائے ۔ بن لادن کمپنی کی طرف سے کئی ملازمین کو خدمات سے برطرف کئے جانے کی بھی اطلاع ملی ہے ۔

Tuesday, 29 March 2016

 مکہ اورمدینہ میں رباط کے معاملہ کی یکسوئی کیلئے ایک وفد کو سعودی عرب روانہ کیاجائے گا

مکہ اورمدینہ میں رباط کے معاملہ کی یکسوئی کیلئے ایک وفد کو سعودی عرب روانہ کیاجائے گا





مجلس کے فلورلیڈر اکبرالدین اویسی کے مطالبہ پر وزیراعلیٰ کے چندرشیکھرراؤ نے وقف اراضیات کے تحفظات کیلئے کمیٹی تشکیل دینے کااعلان کیا ہے۔ منگل کواسمبلی میں تصرف بل پر مباحث کا جواب دیتے ہوئے وزیراعلیٰ نے کہاکہ اردو کو ملازمت سے جوڑنے کیلئے حکومت سنجیدہ ہے۔ انہوں نے کہاکہ سب انسپکٹرس کے تحریری امتحانات کے پرچوں کی جانچ کیلئے اگر عملہ دستیاب ہے تواردو میں امتحان منعقد کرنے میں حکومت کوکوئی اعتراض نہیں ہے۔ وزیراعلیٰ نے کہاکہ مکہ اورمدینہ میں رباط کے معاملہ کی یکسوئی کیلئے ایک وفد کو سعودی عرب روانہ کیاجائے گا۔ انہوں نے یہ بھی بتایاکہ حکومت کی طرف سے ستراقامتی اسکولس میں اردو جاننے والوں کا تقررکیاجائے گا۔ وزیراعلیٰ نے سابقہ آندھرائی حکومتوں کے برخلاف تلنگانہ کی ٹی آر ایس حکومت کے اقتدار کی ستائش کرنے پراکبراویسی کا شکریہ ادا کیا۔ وزیراعلیٰ نے یہ بھی کہا کہ مئی کے مہینہ میں بی اے سی کے تحت تقررات عمل میں لائے جائیں گے۔
مصر کے اغوا کئے گئے مسافر طیارہ میں سوار بیشتر مسافرین کو آزاد کردیا گیا

مصر کے اغوا کئے گئے مسافر طیارہ میں سوار بیشتر مسافرین کو آزاد کردیا گیا



مصر کے اغوا کئے گئے مسافر طیارہ میں سوار بیشتر مسافرین کو آزاد کردیا گیا ہے ۔ مصر کی فضائی کمپنی ایر ایجپٹ کی فلائٹ ایم ایس ایک سو اکیاسی کو مصر کے شہر اسکندریہ سے قاہرہ جانے کے دوران ایک مسلح شخص نے یرغمال بنالیا تھا ۔ ایر ایجپٹ کے انتظامیہ کا کہنا ہے کہ مذاکرات کے بعد طیارہ کے عملہ اور چار غیرملکی مسافرین کے سوائے تمام مسافرین کو طیارہ سے باہر جانے کی اجازت دے دی گئی ہے ۔ اغوا کنندے کے قبضہ میں موجود غیرملکیوں کا تعلق یوروپ سے بتایا گیا ہے ۔اطلاعات کے مطابق اس طیارہ کو قبرص کے لارناکا ایرپورٹ پر اتارا گیا تھا۔ اغوا کنندے نے قبرص میں موجود اپنی سابقہ اہلیہ سے بات کرنے کی خواہش کا اظہار کیا تھا جسے ایرپورٹ طلب کیا گیا ۔ مقامی حکام نے بتایا کہ طیارہ کا اغوا ہونا دہشت گردی کا واقعہ نہیں تھا ۔مصر کی سرکاری نیوز ایجنسی نے بتایا کہ اغوا کنندے کا تعلق مصر سے ہے لیکن بعض اطلاعات میں اس کا تعلق لیبیا سے بتایا جارہا ہے ۔ اس واقعہ کے بعد لارناکا ایرپورٹ پر فضائی آپریشن ملتوی کردیا گیا ہے۔ یہ بھی پتہ چلا تھا کہ اغوا کنندے نے پائلٹ کو دھمکی دی تھی کہ اس کے پاس دھماکو اشیا موجود ہے اور اس کی بات نہیں سنی گئی تو وہ دھماکہ سے طیارہ کو اڑادے گا۔اس طیارہ میں دس امریکی‘ آٹھ برطانوی اور چار ہالینڈ کے شہری بھی سوار بتائے گئے ہیں ۔ میڈیا میں اغوا کنندے کا تصویر میں جاری کی گئی ۔ اس واقعہ کے بعد لارناکا کے ایرپورٹ پر کافی افراتفری دیکھی گئی ۔
تاج محل کے میناروں کو نقصان پہونچنے کی اطلاع

تاج محل کے میناروں کو نقصان پہونچنے کی اطلاع



آگرہ میں واقع تاریخی تاج محل کے میناروں کو مرمتی کاموں اور آہک پاشی کے 
دوران نقصان پہونچنے کی اطلاع ملی ہے ۔ مقامی شاہی مسجد کے متولی نے بتایا کہ گزشتہ کئی سالوں سے یہاں پر آہک پاشی کے کام ہوتے آئے ہیں لیکن اس بار کام کے دوران میناروں کے کچھ تکڑے گر پڑے ۔ انہوں نے کہا کہ محکمہ آثار قدیمہ کی طرف سے مناسب اقدامات نہیں کئے جارہے ہیں ۔ اس کی وجہ سے یہ واقعہ پیش آیا ہے ۔ بتایا گیا ہے کہ پیر کو مرمتی کاموں کے دوران تاج محل کے چارمیناروں کے بعض تکڑے گر پڑے تھے تاہم اس واقعہ میں کوئی بھی زخمی نہیں ہوا ۔
دہلی میں جیولرس شاپ مالکان اور ملازمین کی طرف سے بی جے پی کے دفتر کے روبرو احتجاج

دہلی میں جیولرس شاپ مالکان اور ملازمین کی طرف سے بی جے پی کے دفتر کے روبرو احتجاج



دہلی میں جیولرس شاپ مالکان اور ملازمین کی طرف سے بی جے پی کے دفتر کے روبرو احتجاج کیا گیا ۔ احتجاجی ایکسائز ڈیوٹی میں کئے گئے اضافہ کو واپس لینے کا مطالبہ کرتے ہوئے نعرے بازی کررہے تھے ۔ پولیس کی طرف سے بیریکیٹس عبور کرنے کی کوشش کرنے والے بعض احتجاجیوں کو گرفتار بھی کیا گیا ۔ احتجاجیوں کا کہنا تھا کہ وہ اٹھائیس دنوں سے احتجاج کررہے ہیں لیکن پرامن احتجاج کرنے والوں پر لاٹھیاں برسائی جارہی ہیں اور انہیں زدوکوب بھی کیا جارہا ہے ۔
محبوبہ مفتی مہورت کا انتظار کررہی ہیں

محبوبہ مفتی مہورت کا انتظار کررہی ہیں



جموں و کشمیر کے سابق وزیراعلی عمر عبداللہ نے کہا ہے کہ محبوبہ مفتی مہورت کا انتظار کررہی ہیں اور شبھ مہورت نکلتے ہی محبوبہ مفتی حلف لیں گی۔ سابق وزیراعلی نے کہا کہ کشمیر کے عوام حکومت کی تشکیل کا انتظار کررہے ہیں۔ انہوں نے سوال کیا کہ آخر وزیراعظم نے محبوبہ مفتی کو کیا تیقن دیا ہے اس کی انہیں وضاحت کرنی چاہیے۔ عمر عبداللہ نے کہا کہ بھارت ماتا کی جئے کہنے کیلئے انہیں کوئی مجبور نہیں کرسکتا ۔
ہندوستان کی روایات ہندو دھرم کے مطابق چلتی آئے ہے : یوگی آدتیہ ناتھ

ہندوستان کی روایات ہندو دھرم کے مطابق چلتی آئے ہے : یوگی آدتیہ ناتھ


بی جے پی کے رکن پارلیمنٹ یوگی آدتیہ ناتھ نے کہا ہے کہ ہندوستان کی روایات ہندو دھرم کے مطابق چلتی آئے ہے اور ویدوں میں بھی ملک کی سرزمین کو ماں کا درجہ دیا گیا ہے ۔ ان کا کہنا تھا کہ ہندوستان کے ہر شہری کو بھارت ماتا کی جئے کہنے میں گریز نہیں کرنا چاہئے اور اگر کسی کو یہ کہنا پسند نہیں ہے تو ایسے افراد کو اپنی ماں کے بارے میں بھی صحیح معلومات نہیں ہوگی ۔
دو ہزار دو اور مارچ دو ہزار تین میں ہوئے بم دھماکوں کے دس ملزمین قصوروار

دو ہزار دو اور مارچ دو ہزار تین میں ہوئے بم دھماکوں کے دس ملزمین قصوروار



ممبئی کی خصوصی کوٹا عدالت نے دسمبر دو ہزار دو اور مارچ دو ہزار تین میں ہوئے بم دھماکوں کے دس ملزمین کو کوٹا آرمس ایکٹ ریلوے ایکٹ کے تحت قصوروار قرار دیا ہے ۔ تاہم تین ملزمین ندیم ‘ ہارون اور عدنان ملا کو بری کردیا گیا ۔ اسپیشل جج پی آر دیشمکھ نے مقدمہ کا فیصلہ سنایا لیکن ابھی سزاؤں کا تعین نہیں کیا گیا ہے ۔ ان دھماکوں کے سلسلہ میں جملہ سولہ افراد کو گرفتار کیا گیا تھا ۔ استغاثہ نے مزمل انصاری کیلئے سزائے موت کی عدالت سے درخواست کی ہے ۔ جمعیۃ علما کے مقامی سکریٹری گلزار اعظمی نے کہا ہے کہ وہ عدالت کے فیصلہ کا احترام کرتے ہیں اور جب عدالت کی طرف سے سزاوں کا تعین کیا جائے گا اس کے بعد آئندہ کی حکمت عملی کو قطعیت دی جائے گی ۔ واضح رہے کہ چھ دسمبر کو ممبئی سنٹر ریلوے اسٹیشن کے پاس پہلا دھماکہ ہوا تھا ‘ ستائس جنوری دو ہزار تین کو ولے پارلے کے پاس بھی دھماکہ ہوا تھا ۔ اور تیرہ مارچ دو ہزار تین کو ملند ریلوے اسٹیشن پر بھی دھماکہ ہوا تھا ۔ ان دھماکوں میں بارہ افراد ہلاک ہوئے تھے ۔ ممبئی پولیس نے ان دھماکوں میں ممنوعہ تنظیم سیمی کے کارکن ثاقب کو اہم ملزم قرار دیا تھا ۔ ثاقب کے علاوہ مزمل انصاری ‘ ڈاکٹر انور علی کو بھی پولیس نے گرفتار کیا تھا ۔
اترکھنڈ: اکتیس مارچ کو صبح گیارہ بجے ووٹنگ کرائی جائے ہائیکورٹ کی ہدایت

اترکھنڈ: اکتیس مارچ کو صبح گیارہ بجے ووٹنگ کرائی جائے ہائیکورٹ کی ہدایت



اترکھنڈ ہائیکورٹ نے ریاست میں سیاسی بحران اور صدر راج کے تناظر میں اکتیس مارچ کو اسمبلی میں اکثریت ثابت کرنے کیلئے رائے دہی کی ہدایت دی ہے ۔ عدالت نے کہا کہ اکتیس مارچ کو صبح گیارہ بجے ووٹنگ کرائی جائے۔ ہائیکورٹ کی ہدایت کے بعد میڈیا سے بات کرتے ہوئے کانگریس پارٹی کے وکیل ابھیشیک منو سنگھوی نے کہا کہ کانگریس کے باغی نو ارکان اسمبلی بھی رائے دہی میں حصہ لیں گے اور ان کے ووٹ علحدہ رکھے جائیں گے۔ عدالت نے اسپیکر کو ہدایت دی کہ ووٹنگ کے بعد نتیجہ کا اعلان نہ کیا جائے اور اسے ایک مہربند لفافے میں عدالت کو پیش کیا جائے ۔
پٹھان کوٹ میں پاکستانی تحقیقاتی ٹیم کی آؤبھگت باعث شرم

پٹھان کوٹ میں پاکستانی تحقیقاتی ٹیم کی آؤبھگت باعث شرم



شیو سینا کے لیڈر سنجے راوت نے کہا ہے کہ پٹھان کوٹ میں پاکستانی تحقیقاتی ٹیم کی آؤبھگت باعث شرم ہے ۔ میڈیا سے بات کرتے ہوئے پارٹی کے سینئر لیڈر سنجے راوت نے کہا کہ ہمارے ملک میں ایسا ہی ہوتا آیا ہے ۔ پاکستان سے دہشت گرد آئیں ‘ اداکار آئیں ‘ کرکٹرس آئیں انہیں ہی سکیوریٹی فراہم کی جاتی ہے ۔ ملک کے عوام کو سکیوریٹی فراہم نہیں کی جاتی ۔ سنجے راوت نے کہا کہ سرحد پر ملک کے جوان پاکستانی فوج کے ہاتھوں ماریں گئے انہیں بھی کسی طرح کی سکیوریٹی نہیں ہے ۔ پٹھان کوٹ میں جو کچھ ہوا اس میں سیدھے طور پر پاکستان ملوث ہے اس کی ذمہ داری حافظ سعید نے بھی لی تھی اس کے باوجود پاکستان کی تحقیقاتی ٹیم کی جس طرح سے خاطر ہورہی ہے یہ ملک کے وقار کی توہین ہے ۔
سکندرآباد کے الوال میں پیش آئے سڑک حادثہ میں تین افراد ہلاک

سکندرآباد کے الوال میں پیش آئے سڑک حادثہ میں تین افراد ہلاک



سکندرآباد کے الوال میں پیش آئے سڑک حادثہ میں تین افراد ہلاک اور سات افراد زخمی ہوگئے ۔ یہ حادثہ اس وقت پیش آیا جب کار نے پُل پر ٹو وہیلر کو ٹکر دے دی اور توازن کھوکر پل سے نیچے گر پڑی ۔ اس حادثہ میں کار میں سوار دو افراد جن میں ایک کم عمر لڑکی بھی شامل ہے کے علاوہ موٹر سائیکل سوار بھی ہلاک ہوگیا اور سات افراد زخمی ہوگئے ۔ کار میں سوار افراد حکیم پیٹ میں ایک تقریب سے واپس ہورہے تھے کہ یہ حادثہ پیش آیا ۔ مرنے والوں میں پینسٹھ سالہ کرشنما چاری ‘ تیرہ سالہ کامینی ‘ اور بائیک سوار شکتی سنگھ شامل ہیں ۔ حادثہ کے وقت کار میں نو افراد سوار تھے ۔ اطلاع ملتے ہی پولیس وہاں پہونچی اور راحت کاموں کا آغاز کردیا ۔
 ترمیمی بل تلنگانہ اسمبلی میں آج منظور کرلیا گیا

ترمیمی بل تلنگانہ اسمبلی میں آج منظور کرلیا گیا



اسمبلی اور کونسل کے ارکان کی تنخواہوں ‘ سابق ارکان کے وظیفہ اور ارکان مقننہ کی بیواؤں کے وظیفہ میں اضافہ کا ترمیمی بل تلنگانہ اسمبلی میں آج منظور کرلیا گیا ۔ بل کی پیشکشی کے موقع پر کانگریس کے سمپت کمار ‘ بی جے پی کے رام چندر راؤ نے مباحث میں حصہ لیتے ہوئے سابق ارکان اسمبلی کے وظیفہ کے علاوہ گاڑیوں کیلئے دیئے جانے والے قرض کی رقم میں اضافہ کا مطالبہ کیا ۔ اس پر مداخلت کرتے ہوئے وزیر اعلی چندر شیکھر راؤ نے کہا کہ یہ فینانس بل ہے ۔ گورنر کی منطوری کے بعد یہ بل ایوان میں پیش کیا گیا ہے ۔ بل میں ترمیم کیلئے اسے دوبارہ گورنر کو بھیجنا ہوتا ہے ۔ انہوں نے کہا کہ اسمبلی کے آئندہ سیشن میں اس بل میں ترمیم کی جائے گی ۔ انہوں نے کہا کہ ارکان اسمبلی و کونسل کی تنخواہوں میں اضافہ کو میڈیا گناہ کے طور پر پیش کررہا ہے ۔ لیکن درحقیقت ارکان مقننہ کے مسائل اور حلقہ کے عوام کی ضروریات کو پورا کرنے کیلئے ارکان مقننہ کو مشکلات پیش آرہی ہیں ۔ انہوں نے تنخواہوں میں اضافہ کے سلسلہ میں تمام تفصیلات پر روشنی ڈالی ۔ انہوں نے کہا کہ اسمبلی حلقوں میں ارکان کے سرگرم ہونے اور بدعنوانیوں کے خاتمہ کیلئے تنخواہوں میں اضافہ کا فیصلہ کیا گیا ۔ تنخواہوں میں اضافہ سے بیالیس کروڑ روپئے کا بوجھ پڑے گا جو بجٹ کا صفر فیصد بھی نہیں ہے ۔ انہوں نے میڈیا سے اپیل کی کہ وہ تنخواہوں میں اضافہ پر نکتہ چینی نہ کریں ۔ بعد ازاں اس ترمیمی بل کو منظور کرلیا گیا ۔
ملک کے کئی مقامات پر خشک سالی سے کسان سخت پریشان

ملک کے کئی مقامات پر خشک سالی سے کسان سخت پریشان


ملک کے کئی مقامات پر خشک سالی سے کسان سخت پریشان ہیں ۔ ایک طرف فصلوں کی کاشت نہیں ہو پارہی ہے تو دوسری طرف قرض کا بوجھ ان کے سر پر منڈلا رہا ہے ۔ کئی کسان خشک سالی ‘ فصلوں کو ہوئے نقصان اور قرض کے بوجھ کی وجہ سے خودکشی بھی کرنے لگے ہیں ۔ دوسری طرف ایسے کسان جو اپنے جانوروں کو فروخت کرنا چاہتے ہیں وہ بھی بعض ریاستوں میں بیف پر پابندی کی وجہ سے فروخت نہیں کرپارہے ہیں ۔ نیوز ایجنسی رائٹرس نے مہاراشٹرا ‘ اترپردیش اور ہریانہ کے کئی اضلاع میں کسانوں کی حالت اور مویشیوں کے مالکان سے انٹرویوز لئے ہیں جس میں خشک سالی سے متاثرہ مہاراشٹرا کے ایک کسان ریواجیت چودھری کا کہنا ہے کہ اس نے چالیس ہزار روپئے میں جانوروں کو خریدا تھا لیکن آج وہ اسے فروخت نہیں کرپا رہا ہے ۔ یہاں تک کہ وہ پندرہ تا بیس ہزار روپئے اس جانور کو فروخت کرنا چاہتے ہیں لیکن کوئی خریدار نہیں ہے ۔ جانور کو چارہ کھلانا اب اس کے بس کی بات نہیں رہی۔ حکومت کو چاہئے کہ بیف پر عائد پابندی کو ختم کیا جائے ۔ دوسری طرف وشواہندو پریشد کے گاؤ بچاؤ شعبہ کے ذمہ داری نے بتایا ہے کہ جب سے گاؤذبیحہ پر پابندی لگائی گئی ہے گائیوں کی موت میں کمی ہوئی ہے ۔ دوسری طرف لکھنو قصائی اسوسی ایشن کے لیڈر رحمن قریشی نے بتایا ہے کہ ریاست کے کئی مقامات پر چھوٹے گروپ گاڑیوں کی تلاشی لے رہے ہیں چاہے وہ کوئی بھی گوشت ہو وہ لوٹ مارکرتے ہیں اور گاڑیوں کو نقصان پہونچایا جاتا ہے ۔ ان کا بھی کہنا تھا کہ یہ عمل ٹھیک نہیں ہے حکومت کو اس پر غور کرنا چاہئے ۔ ہندو عوامی شعور بیداری تنظیم کی نمائندہ سندیپ کور نے کہا ہے کہ دنیا کے بعض ممالک میں مذہبی عقائد کی خلاف ورزی پر قوانین بنائے گئے ہیں اورجب ہندوستان میں اس طرح کی بات کی جاتی ہے تو کیوں اس پر واویلا مچایا جاتا ہے ۔ دسری طرف کسانوں نے کہا ہے کہ بڑے مویشیوں کو پالنا اور ان کی نگرانی کرنا اب ان کے بس میں نہیں رہا ہے ۔

Monday, 28 March 2016

بہادر پورہ میں چربی پگھلاکر تیل بنانے والی ناجائز فیکٹری کا پردہ فاش

بہادر پورہ میں چربی پگھلاکر تیل بنانے والی ناجائز فیکٹری کا پردہ فاش




بہادر پورہ میں چربی پگھلاکر تیل بنانے والی ناجائز فیکٹری کا پردہ فاش ہوا ہے۔ حکومت‘ بلدیہ وپولیس کے لاکھ دعوؤں کے باوجود عوام کی جانوں کیلئے سخت مضر چربی کا تیل کھلے عام تیار کیاجارہا ہے۔ ایم او کالونی بہادر پورہ کے زندہ ضمیر اور چربی کے پگھلنے کی وجہ سے پھیلنے والے تعفن ودھویں سے پریشان حال عوام کی اطلاع پر فورٹی وی کے نمائندہ نعمان نے جان کی پرواہ کئے بغیر انسانی صحت کیلئے زہر ثابت ہونے والے تیل کی فیکٹری کا پردہ فاش کیا ہے۔ جہاں سینکڑوں کنٹل چربی موجود تھی ۔ تین بھٹیوں کے ذریعہ اسے پگھلایاجارہاتھا اور پیاکنگ کے ڈبے موجود تھے۔ مقامی افراد نے بتایاکہ اس فیکٹری کی وجہ سے بچے‘ جوان‘ بوڑھے سب اکثربیمار رہتے ہیں۔ ان کے مطابق فیکٹری کا مالک کافی اثرورسوخ کا حامل ہے جس کی وجہ سے پولیس یا حفظان صحت کا ذمہ دار محکمہ یہاں ہاتھ ڈالنے سے ڈرتا ہے۔ واضح رہے کہ فورٹی وی نے اس سے قبل بھی چربی کا تیل‘ اس کی سپلائی اور استعمال ہونے والے نقصانات سے ناظرین کو واقف کروایاتھا۔ شہر کی کئی ہوٹلوں اوربنڈیوں پر دستیاب غذاؤں میں یہ تیل استعمال کیاجاتا ہے۔
ایمسیٹ : آن لائن درخواستوں کے ادخال کیلئے مزید دو دن کی مہلت

ایمسیٹ : آن لائن درخواستوں کے ادخال کیلئے مزید دو دن کی مہلت



ایمسیٹ امتحان کیلئے آن لائن درخواستوں کے ادخال کیلئے مزید دو دن کی مہلت دی گئی ہے۔ اعلیٰ تعلیمی بورڈ نے بتایاکہ اعلامیہ کے مطابق اٹھائیس مارچ تک آن لائن درخواستیں داخل کی جاسکتی تھیں اب اس میں دودن کی توسیع کی گئی ہے۔ درخواستوں کی درستگی کا عمل تین تا تیرہ اپریل ہے ۔ہال ٹکٹس چوبیس تا تیس اپریل کے درمیان ڈان لوڈ کئے جاسکتے ہیں۔ دو مئی کوامتحان مقرر ہوگا۔
کانسٹبلس کی جائیدادوں کیلئے تحریری امتحان چوبیس اپریل کو منعقد

کانسٹبلس کی جائیدادوں کیلئے تحریری امتحان چوبیس اپریل کو منعقد



تلنگانہ میں کانسٹبلس کی جائیدادوں کیلئے تحریری امتحان چوبیس اپریل کو منعقدہوگا۔ اس سے پہلے تین اپریل کو یہ امتحان منعقدہونے والاتھا لیکن آر آر وی امتحان کی وجہ سے اسے ملتوی کیاگیاتھا۔ سب انسپکٹر کا تحریری امتحان سترہ اپریل کو منعقدہوگا۔
اکھلیش یادو حکومت سنگھ پریوار سے ملی ہوئی ہے: بیرسٹر اویسی کا بیان

اکھلیش یادو حکومت سنگھ پریوار سے ملی ہوئی ہے: بیرسٹر اویسی کا بیان



مجلس اتحاد المسلمین کے سربراہ بیرسٹر اسد الدین اویسی نے لکھنو کے پاس دیوا شریف میں ایک پر ہجوم پریس کانفرنس کے دوران اکھلیش یادو کی حکومت کو کڑی تنقید کا نشانہ بناتے ہوئے کہا ہے کہ اکھلیش حکومت نے مظفر نگر فسادات میں خود کو کلین چٹ دے کر آخر کیا ثابت کیا ہے ۔ بیرسٹر اویسی اور ان کی جماعت کو یوپی میں جلسے نہ کرنے دینے کی اکھلیش حکومت کی پالیسی کی سحت تنقید کرتے ہوئے اسد الدین اویسی نے کہا کہ آر ایس ایس کو تو جلسوں کی اجازت دی جاتی ہے مگر مجلس اتحاد المسملمین کو جلسے کرنے سے منع کیا جاتا ہے بیرسٹر اویسی کا کہنا تھا کہ اس سے صاف ظاہر ہوتا ہے کہ اکھلیش یادو کی سماج وادی حکومت آر ایس ایس بی جے پی اور فرقہ پرستوں سے ملی ہوئی ہے ۔بیرسٹر اویسی نے کہا کہ حب الوطنی کے لئے مسلمانوں کو کسی قسم کا ثبوت پیش کرنے کی کوئی ضرورت نہیں ہے انہوں نے کہا کہ ہمیں نعرے لگاکر حب الوطنی کا ثبوت پیش کرنے کے لئے مجبور نہیں کیا جاسکتا ۔
اس دوران بیرسٹر اویسی نے یوپی کے شیعہ رہنما مولانا کلب جواد سے بھی ملاقات کی اور یوپی میں مسلمانوں کی صورتحال پر تبادلہ خیال کیا ۔بیرسٹر اویسی نے یوپی میں بڑی تعداد میں مسلم اقلیت ہونے کے باوجود یوپی کی حکومت کی جانب سے اقلیت کو نظر انداز کئے جانے کو باعث تشویش قراردیا اور کہا کہ مجلس یوپی کی اقلیت کو انصاف دلانے کے لئے جد و جہد کریگی ۔بیرسٹر اویسی نے لکھنو کے علاقے بلاقی اڈہ میں پارٹی ارکان سے بھی ملاقات کی ۔بیرسٹر اویسی مسلم پرسنل لا بورڈ کے صدر مولانا رابع حسنی ندوی سے بھی ملاقات کرینگے ۔اس موقع پر ہندوستان زندہ باد کے فلک شگاف نعروں کے ساتھ بیرسٹر اویسی کا استقبال کیا گیا ۔
ریاست میں جملہ دو سو چار شی ٹیمیں کام کررہی ہیں

ریاست میں جملہ دو سو چار شی ٹیمیں کام کررہی ہیں



ریاستی وزیر داخلہ این نرسمہا ریڈی نے تلنگانہ اسمبلی میں مختصر نوٹس پر شی ٹیم سے متعلق اٹھائے گئے سوال پر بتایاکہ ریاست میں جملہ دو سو چار شی ٹیمیں کام کررہی ہیں جن میں حیدرآباد میں سو ‘ سائبرآباد میں ساٹھ اور اضلاع میں چوالیس ٹیمیں ہیں۔ اضلاع میں ان ٹیموں میں مزید توسیع پر غور کیا جارہا ہے ۔ اب تک دو ہمار چار سو افراد کی کونسلنگ کی گئی ہے جو لڑکیوں اور خواتین سے چھیڑ چھاڑ کررہے تھے ۔ ایک ہزار سات سو بیس افراد کو حراست میں لیا گیا اور تین سو پندرہ افراد کے خلاف معاملات دائر کئے گئے ۔ انہوں نے کہا کہ شی ٹیموں کے ذریعہ لڑکیوں اور خواتین سے چھیڑ چھاڑ ‘ مظالم کے واقعات کے خاتمہ کیلئے مختلف اقدامات کئے جارہے ہیں ۔
ریت مافیا کے خلاف آہنی پنجہ سے نمٹا جائے گا  :  ہریش راؤ

ریت مافیا کے خلاف آہنی پنجہ سے نمٹا جائے گا : ہریش راؤ



ریاستی وزیر ہریش راؤ نے آج ایک سوال کے دوران اسمبلی میں بتایا کہ ریت مافیا کے خلاف آہنی پنجہ سے نمٹا جائے گا ۔ انہوں نے کہا کہ ماضی کے مقابلہ ریت کی قیمتوں میں کمی ہوئی ہے۔ اس سال ریت سے تین سو پینسٹھ کروڑ روپئے کی آمدنی ہوئی ہے جو گزشتہ پانچ برسوں میں نہیں ہوئی ۔ اب تک پانچ ہزار چوریانوے ایسے معاملات درج کئے گئے جن میں ریت کی غیر قانونی طور پر منتقلی کی جارہی تھی اور ایسے افراد سے گیارہ کروڑ روپئے جرمانہ حاصل کیا گیا ۔ انہوں نے کہا کہ آن لائن ریت حاصل کرنے کی سہولت فراہم کی جارہی ہے ۔ غیر قانونی طور پر ریت کی منتقلی پر ضبط کی گئی ریت کو سرکاری استعمال میں لایا جارہا ہے ۔
پرانے شہر میں فائر اسٹیشنوں کی تعداد میں اضافہ کیا جاے

پرانے شہر میں فائر اسٹیشنوں کی تعداد میں اضافہ کیا جاے


مجلس کے رکن اسمبلی احمد پاشاہ قادری نے آج اسمبلی میں وقفہ سوالات کے دوران فائر اسٹیشنوں کی کارکردگی سے متعلق سوال اٹھاتے ہوئے کہا کہ پرانے شہر میں فائر اسٹیشنوں کی تعداد میں اضافہ کیا جانا چاہئے ۔ انہوں نے کہا کہ آگ لگنے کے واقعات پر فائر بریگیڈ کے کافی تاخیر سے پہونچنے کی اطلاعات ہوتی ہے ۔ انہوں نے کہا کہ جدید آلات کے لحاظ سے سہولت فراہم کی جائے جس پر وزیر داخلہ نرسمہا ریڈی نے کہا کہ پرانے شہر میں دس فائر اسٹیشنس ہیں ۔ ان کی تعداد میں اضافہ کیا جائے گا ۔ لیکن اٹھارہ ایسے حلقے جہاں فائر اسٹیشنس نہیں ہے ۔ ان کو ترجیح دی جائے گی ۔ حکومت ورنگل اور حیدرآباد کیلئے فائر اسٹیشنوں میں اضافہ کی تجویز رکھتی ہے ۔ گلی کوچوں میں آگ لگنے کے واقعات سے نمٹنے موٹر سائیکل پر فائر اسٹیشن کی شروعات کی گئی ہے تاکہ تاخیر سے پہونچنے کے واقعات سے نمٹا جاسکے ۔
فائرنگ کی زد میں آکر دلہن کے والد ہلاک

فائرنگ کی زد میں آکر دلہن کے والد ہلاک



مدھیہ پردیش کے اجین میں شادی کے ایک گھر میں اس وقت ماتم چھاگیا جب دولہے کے والد جشن منارہے رشتہ داروں کی فائرنگ کی زد میں آکر ہلاک ہوگئے۔ اس واقعہ کا ویڈیو منظرعام پر آیا ہے جس میں بعض افراد کو فائرنگ کرتے ہوئے دیکھا گیا۔ دلہے کا باپ اچانک گولی لگنے سے گرپڑا اسے فوری دواخانہ منتقل کیا گیا لیکن ڈاکٹرس نے اسے مردہ قرار دیا۔ مہلوک کی شناخت منصور کی حیثیت سے کی گئی ہے۔ پولیس نے ویڈیو فوٹیج کو اپنی تحویل میں لے لیا ہے اور ملزمین کی تلاش شروع کردی گئی ہے ۔
آج کا دن میرے لئے فخر کا دن ہے : سائنا نہوال

آج کا دن میرے لئے فخر کا دن ہے : سائنا نہوال



حیدرآبادی بیاڈمنٹن اسٹار سائنا نہوال نے انہیں پدمابھوشن ایوارڈ دیئے جانے پر حکومت ہند سے اظہار تشکر کیا ہے ۔ میڈیا سے بات کرتے ہوئے سائنا نہوال نے کہا کہ یہ ایوارڈ ان کے مستقبل کے مقابلوں کیلئے حوصلہ افزائی میں مددگار ثابت ہوگا ۔ سائنا نے کہا کہ وہ اپنے ملک کا نام اور روشن کرنا چاہتی ہے ۔ سائنا نے کہا کہ آج کا دن ان کیلئے ایک فخر کا دن ہے اور آج وہ کافی خوش ہیں ۔
آٹھ پدما بھوشن ‘ پانچ پدما وبھوشن اور ترتالیس پدم شری ایوارڈس کی تقسیم

آٹھ پدما بھوشن ‘ پانچ پدما وبھوشن اور ترتالیس پدم شری ایوارڈس کی تقسیم


 صدر جمہوریہ پرنب مکرجی نے آج راشٹرپتی بھون میں پدما ایوارڈس تقسیم کئے ۔ صدر جمہوریہ کے ہاتھوں آٹھ پدما بھوشن ‘ پانچ پدما وبھوشن اور ترتالیس پدم شری ایوارڈس کی تقسیم عمل میں آئی ۔ ریلائنس کے بانی دھیرو بانی امبانی کو بعد از مرگ پدماوبھوشن ایوارڈ سے نوازا گیا ۔ ان کی اہلیہ نے یہ ایوارڈ حاصل کیا ۔ جموں و کشمیر کے سابق گورنر جگموہن آرٹ آف لیونگ کے سری سری روی شنکر ‘ ہند۔امریکی معاشی ماہر اویناش ڈکشٹ اور مشہور رقاصہ یامنی کرشنامورتی کو پدماوبھوشن ایوارڈ سے نوازا گیا ۔ پدمابھوشن ایوارڈ پانے والوں میں فلم اسٹار انوپم کھیر ‘ بیاڈمنٹن اسٹار سائنا نہوال ‘ حفیظ سہراب کنٹراکٹر ‘ اے وینکٹ راماراؤ اور ناگیشور ریڈی شامل ہے ۔ پدم شری ایوارڈ پانے والوں میں قابل ذکر فلم اسٹار اجئے دیوگن ‘ فلم ساز مدھر بھنڈارکر ‘ اتھیلیٹ دپیکا کماری ‘ امتیاز قریشی ‘ کلاسیکل موسیقار پنڈت تلسی داس ‘ سماجی کارکن اجوئے کمار دتہ ‘ فلم ڈائرکٹر نریش چندرلال ‘ سماجی کارکن گوپی ناتھ نائر ‘ صحافی پشپیش پنت اور پروفیسر گنپتی دادا صاحب یادو قابل ذکر ہیں ۔ واضح رہے کہ مرکزی حکومت نے یوم جمہوریہ کے موقع پر ایک سو بارہ ممتاز شخصیتوں کیلئے پدما ایوارڈس کا اعلان کیا تھا ۔ ایوارڈ یافتگان میں شامل فلم اسٹارس رجنی کانت ‘ پرینکا چوپڑہ اور ٹینس اسٹار ثانیہ مرزا کو علحدہ تقریب میں آئندہ ماہ ایوارڈس دیئے جائیں گے ۔
ترسٹھ ویں قومی فلم ایوارڈس کا اعلان

ترسٹھ ویں قومی فلم ایوارڈس کا اعلان



ترسٹھ ویں قومی فلم ایوارڈس کا اعلان کردیا گیا ہے ۔ بہترین اداکار کا ایوارڈ فلم پیکو کیلئے امیتابھ بچن کو دیا گیا ہے ۔ جبکہ بہترین اداکارہ کیلئے فلم ’تنو ویڈس منو ریٹرنس‘ کی ہیروئن کنگنا رناوت کو دیا گیا ہے ۔ تلگو فلم باہو بلی کو بہترین فلم کے ایوارڈس سے نوازا گیا ہے ۔ فلم باجی راؤ مستانی کیلئے سنجے لیلا بھنسالی کی بہترین ہدایت کار کے ایوارڈ کیلئے منتخب کیا گیا ہے ۔ بہترین عوامی پسندیدہ فلم کیلئے بجرنگی بھائی جان کا انتخاب کیا گیا ہے ۔ گجرات ریاست کو فلم دوست ریاست کے ایوارڈ سے نوازا گیا ہے ۔ بہترین تلگو فلم کے ایوارڈ کانچی نے اپنے نام کیا ہے ۔ بہترین ڈانس ڈائرکٹر کا ایوارڈ باجی راؤ مستانی کیلئے ریمو ڈیسوزا کو ملا ہے ۔ جیوری نے آج ان ایوارڈس کا اعلان کیا ۔ واضح رہے کہ کنگنا رناوت نے فلم کوئن کیلئے ایوارڈ جیتا تھا ۔
محمود مدنی نے ملک کی موجودہ صورتحال کو مایوس کن قرار دیا

محمود مدنی نے ملک کی موجودہ صورتحال کو مایوس کن قرار دیا



جمعیۃ علما کے رہنما محمود مدنی نے ملک کی موجودہ صورتحال کو مایوس کن قرار دیا ہے ۔ میڈیا سے بات کرتے ہوئے محمود مدنی نے کہا کہ طبقات کے درمیان میں دراڑیں بڑھ رہی ہے اور بعض طاقتیں ان طبقات کے درمیان میں خلیج بھی پیدا کررہی ہیں۔ انہوں نے کہا کہ ایک طبقہ کو اس بات کا احساس ہورہا ہے کہ وہ غیر محفوظ ہیں اور جب عدم تحفظ کا احساس کوئی طبقہ میں بڑھنے لگتا ہے تو ناامیدی بھی بڑھ جاتی ہے اور یہ ناامیدی اچھی چیز نہیں ہے ۔
 اترکھنڈ میں جمہوریت کا قتل کیا گیا  ۔ کانگریس

اترکھنڈ میں جمہوریت کا قتل کیا گیا ۔ کانگریس



 اترکھنڈ کے وزیر اعلی ہریش راوت نے آج ریاست کے گورنر کے کے پال سے ملاقات کرتے ہوئے چونتیس ارکان اسمبلی کے دستخط کئے ہوئے مکتوب کو حوالہ کیا ۔ بعد میں میڈیا سے بات کرتے ہوئے ہریش راوت نے کہا کہ ان کے ہمراہ دوسری حلیف جماعتوں کے ارکان بھی موجود تھے ۔ ہریش راوت نے کہا کہ آج وہ اکثریت ثابت کرنے کیلئے تیار تھے لیکن اس سے پہلے صدر راج نافذ کرتے ہوئے ریاست کے عوام کی توہین کی گئی ہے ۔ ہریش راوت نے کہا کہ گورنر سے درخواست کی گئی ہے کہ وہ اس موقف پر نظر ثانی کریں اور ریاست میں عوام کی منتخبہ حکومت کو بحال کیا جائے ۔
کیا بی جے پی محبوبہ مفتی کو بھارت ماتا کی جئے کا نعرہ لگانے کو کہے گی ۔

کیا بی جے پی محبوبہ مفتی کو بھارت ماتا کی جئے کا نعرہ لگانے کو کہے گی ۔



 جموں و کشمیر میں بی جے پی اور پی ڈی پی کے درمیان اتحاد والی حکومت بننے جارہی ہے شیو سینا نے کہا ہے کہ کیا بی جے پی محبوبہ مفتی سے بھارت ماتا کی جئے کا نعرہ لگانے کو کہے گی ۔ شیو سینا کے ترجمان اخبار سامنا میں لکھے گئے اداریہ میں محبوبہ مفتی سے یہ مطالبہ کیا گیا ہے کہ وزیر اعلی کا عہدہ سنبھالنے سے قبل انہیں بھارت ماتا کی جئے کا نعرہ لگانا ہوگا ۔ آر ایس ایس کے سربراہ موہن بھاگوت کی طرف سے عالمی سطح پر بھی ہندوستانیوں سے بھارت ماتا کی جئے کے نعرہ کی تجویز پر شیو سینا نے کہا ہے کہ اس کی شروعات کشمیر سے ہونی چاہئے ۔ شیو سینا نے الزام لگایا ہے کہ محبوبہ مفتی پارلیمنٹ حملہ کیس کے ملزم افضل گرو کیلئے ہمدردی رکھتی ہیں اور علحدگی پسندوں سے بھی ان کے تعلقات رہے ہیں ۔
یونیورسٹی کیمپس نہ چھوڑنے پر کنہیا کمار اور عمر خالد کو گولی مارنے ہندو تنظیم کی دھمکی

یونیورسٹی کیمپس نہ چھوڑنے پر کنہیا کمار اور عمر خالد کو گولی مارنے ہندو تنظیم کی دھمکی




اترپردیش کی ایک سیاسی تنظیم نے درگااشٹمی سے قبل جے این یو طلبہ یونین کے لیڈر کنہیا کمار اور طالب علم عمر خالد کو گولی مارنے کی دھمکی دی ہے ۔ اترپردیش نو نرمان سینا نے یہ دھمکی دی ہے کہ اگر کنہیا کمار اور عمر خالد اکتیس مارچ سے پہلے دہلی نہیں چھوڑتے ہیں تو جے این یو کیمپس میں داخل ہوکر انہیں گولی ماری جائے گی ۔ انگریزی اخبار ٹائمس آف انڈیا میں شامل رپورٹ کے مطابق کنہیا کمار کی طرف سے ہندوستانی فوج پر کئے گئے ریمارکس کے بعد اترپردیش نو نرمان سینا کے قومی صدر امیت جانی نے فیس بک پر یہ دھمکی پوسٹ کی ہے ۔ انہوں نے یہ بھی کہا کہ اگر وہ جے این یو میں فائرنگ نہیں کرپائے تو وہ سیاست سے سبکدوش ہوجائیں گے ۔

Sunday, 27 March 2016

Saturday, 26 March 2016

نارسنگھی کے علاقہ حیدر شاہ کوٹ میں دلخراش سڑک حادثہ‘ ایک جوڑا ہلاک

نارسنگھی کے علاقہ حیدر شاہ کوٹ میں دلخراش سڑک حادثہ‘ ایک جوڑا ہلاک



حیدر شاہ کوٹ کے علاقہ میں پیش آئے ایک دل دہلادینے والے حادثہ میں ایک جوڑا برسرموقع ہلاک ہوگیا جبکہ ان کا شیر خوار لڑکا اتفاقاً بچ گیا۔ جمعہ اورہفتہ کی درمیانی شب امجد خان اپنی اہلیہ وسیم بیگم اورنو مہینے کے لڑکے کے ساتھ سن سٹی نانی سے ملنے گئے تھے۔ وہ ملاقات کرکے گھر واپس ہورہے تھے کہ ایک تیز رفتار لاری نے ان کی موٹر سائیکل کو ٹکر دیدی جس کے نتیجے میں امجد خان اور وسیم بیگم برسرموقع ہلاک ہوگئے۔ جبکہ کمسن لڑکے کے سرپر گہری چوٹیں آئی ہیں۔ نارسنگھی پولیس نے ایک کیس درج کرکے ڈرائیورکو حراست میں لیتے ہوئے لاشوں کو پوسٹ مارٹم کیلئے عثمانیہ دواخانہ منتقل کردیا جبکہ کمسن لڑکے کو علاج کیلئے نیلوفردواخانہ منتقل کردیاگیا ہے۔